20 сакавіка пачнуць судзіць палітвязняў, якія вывесілі нацыянальныя сцягі Беларусі і Украіны
Траіх мужчын і дзвюх жанчын абвінавачваюць па ч. 3 арт. 361-1 (стварэнне або ўдзел у «экстрэмісцкім фармаванні») і ч. 2 арт. 361-4 КК (садзейнічанне экстрэмісцкай дзейнасці) Крымінальнага кодэкса. Справу мінчукоў пачне разглядаць 20 сакавіка ў Мінгарсудзе суддзя Дзіна Кучук, паведамляе «Вясна».
У сярэдзіне верасня сілавікі затрымалі пяцярых жыхароў Мінска за тое, што яны вывесілі вялікія нацыянальныя сцягі Беларусі і Украіны на фасадзе дома па сталічнай вуліцы Лесі Украінкі.
Супраць затрыманых узбудзілі крымінальную справу за «злоснае хуліганства». Завуць іх Дзяніс Варозаў, Вячаслаў Панцюшэнка, Вольга Церах, Уладзімір Лавор і Кацярына Зарэцкая.
Праз два тыдні пасля затрымання гэтых людзей МУС прызнала «экстрэмісцкім фармаваннем» канал у дадатку Zello, праз які мінчукі камунікавалі пры арганізацыі акцыі.
