Знайсці
11.03.2023 / 11:2815РусŁacБел

Пра хэйт і лячэнне распавяла маці гродзенскага хлопчыка, які трапіў у ДТЗ у Беластоку і якому беларусы сабралі 300 тысяч еўра

Тысячы людзей дапамагалі маленькаму Мішу выкараскацца са складанай сітуацыі, цуд зрабілі дактары. Праз два месяцы пасля трагедыі маці хлопчыка Вікторыя расказала «АўтаГродна», што цяпер адбываецца ў жыцці яе сям'і.

17 студзеня 2023 года Вікторыя з двума маленькімі сынамі ішла па пешаходным пераходзе ў цэнтры Беластока. З аднаго боку легкавік спыніўся, Міша вырваўся крыху наперад і апынуўся пад Toyota, якая не спыняючыся ехала з другога боку. Маленькага хлопчыка маці выцягвала з-пад машыны. З гэтага моманту жыццё Вікторыі змянілася да непазнавальнасці, яна кажа, што да гэтага часу не верыць, што ўсё гэта праўда, як быццам нейкі сон.

У цяжкім стане Мішу даставілі ў мясцовую лякарню, дзе яго ўвялі ў кому. Дактары лічылі, што хлопчык або не выйдзе з яе, або стане інвалідам. І адбыўся цуд: Міша апрытомнеў, стаў папраўляцца, набірацца сіл, і неўзабаве яго выпісалі з бальніцы. Увесь гэты час лекары прафесійна выконвалі сваю працу.

Адначасова Вікторыя звярнулася да грамадскасці: шукала відавочцаў, юрыстаў і аб'явіла збор. За чатыры дні неабыякавыя людзі ахвяравалі больш за 300 тысяч еўра, і Вікторыя спыніла збор. Гэта быў неверагодны водгук людзей. За гэты ж час на асабістую старонку Вікторыі падпісалася больш за 30 тысяч чалавек, усе яны штодня сачылі за навінамі аб стане Мішы, аб чым гродзенка пісала некалькі разоў на дзень.

Цяпер Міша з мамай знаходзяцца ў Берліне, прайшлі абследаванне ў клініцы Шарытэ, чакаюць аперацыю на вушкі 23 сакавіка, распавяла Вікторыя.

— Міша ўсё яшчэ слабы, ён не вытрымлівае такіх прагулак на дварэ, як раней, скардзіцца на болі ў галаве. Але мы ў руках вельмі дасведчанага спецыяліста, і гэта ўсяляе ўпэўненасць, — кажа яна.

— Пасля таго, як вы закрылі збор, з'явілася навіна , што знаходжанне ў клініцы ў Беластоку аплацяць з польскага бюджэту дзякуючы «Карце паляка». Гэта так?

— Гэта праўда, аднак на момант паступлення ў бальніцу гэтай інфармацыі ў нас не было. Я з самага пачатку казала, што ў нас ёсць «Карта паляка», але мяне запэўнілі, што па ёй аплачваецца толькі мінімальная дапамога. З нас патрабавалі страхоўку, якой у нас не было. І мы звярнуліся да беларусаў па дапамогу. Калі збор быў закрыты, нам сапраўды паведамілі, што выдаткі ў Беластоку пакрые «Карта». Не выключаю, што зрухі адбыліся дзякуючы грамадскаму рэзанансу. Простаму чалавеку без моцнай юрыдычнай дапамогі тут разабрацца складана.

— Што вы плануеце рабіць са зборам, калі рэабілітацыя будзе больш танная? Частку сродкаў са збору вы ўжо перадалі для маленькай Насты Пруцік з Гродна ?

— Штомесяц 5 чысла я публікую падрабязную справаздачу аб выдатках на сваёй старонцы, адказваю ў каментарах. Але наша будучыня пачне праглядацца пасля пачатку рэабілітацыі, а па яе завяршэнні ўся астатняя сума будзе пераведзена на рахункі дабрачынных арганізацый. Мне ні капейкі не трэба з гэтага гора. У сітуацыі з Настай мы бачылі, што дзяўчынцы экстранна патрэбны апошні рывок, і зрабілі перавод. Нам пішуць дзякуй, але гэта не мая заслуга, я не магу гэтым ганарыцца, гэта не мае грошы, гэта дапамога ўсіх тых, хто некалі адгукнуўся на гора Мішы. Вы дапамагалі майму хлопчыку, а дапамаглі ўжо дваім дзеткам, дзякуй вялікі ўсім яшчэ раз.

— Нядаўна ў вас выйшаў эмацыйны пост аб сабраных сродках. Вы атрымлівалі нейкія папрокі ў свой адрас? 

— Вы ведаеце, роўна з таго моманту, як мы выклалі вынікі збору, мне стала пісаць нейкая група людзей і літаральна шантажаваць. Бясконца пішуць ашуканцы, просяць аб пераводзе на іх рахункі грошай пад рознымі падставамі, часам гэтыя людзі пішуць абразлівыя паведамленні ў маім профілі. Спрабуюць ціснуць маральна.

Вікторыя распавяла, што пра хвалю хэйту яе папярэджвалі дзяўчаты з дабрачынных фондаў, што, на жаль, гэта будзе адбывацца. Але добрых людзей болей. Цяпер Вікторыя вывучае гісторыі і рэпутацыю дабрачынных фондаў, каб у будучыні яны правільна выкарысталі ахвяраванні. І ніяк інакш.

— Вы знайшлі відавочцаў аварыі? 

— Так, я дзякую ўсім людзям, хто адгукнуўся. Я нават не ўяўляла, што на той момант побач было так шмат беларусаў. Памятаеце, я расказвала, што сям'я з Беларусі ў момант ДТЗ падбегла да мяне і ўзяла на рукі Глеба, нашага малодшага сына. Яны ж пазней прывезлі яго да мяне ў шпіталь, таму што ён хацеў да мамы. Потым сярод персаналу ў клініцы да мяне адразу падышла дзяўчына, стала суцяшаць і перакладаць словы дактароў — гэта медсястра родам з Гродна. Такіх сустрэч было вельмі шмат, і кожная з іх рабіла мяне мацнейшай.

У Беларусі Мішу чакае ўся яго сям'я, родныя ўвесь час падтрымліваюць яго дыстанцыйна, адпраўляючы відэапаведамленні. Дарэчы, такія паведамленні шлюць нават выхавацелі з сада Мішы. Ён глядзіць гэтыя відэа і адчувае сябе шчаслівым.

— Я вельмі ўдзячная той падтрымцы, якую аказалі мне беларусы. З самага пачатку і па сённяшні дзень я атрымліваю сотні паведамленняў, напоўненых цеплынёй і любоўю. Дзякуй вам за ўсё, што вы зрабілі для Мішы і для нашай сям'і, — дадала Вікторыя.

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
2
Петя/адказаць/
11.03.2023
Эннот, ну потом взыщут и положат себе в карман
0
Кастусiк /адказаць/
12.03.2023
Kažan, магчыма з Картай паляка таксама, як i з ubezpieczeniem. Але гераiня, мацi хлопчыка паведамiла, што мае карту паляка....Неяк так.
0
Ната /адказаць/
24.12.2023
Эннот, В Польше беларусам ничего не светит в плане взыскать.
Паказаць усе каментары
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера