У Крыме паведамілі пра два збітыя беспілотнікі ў раёне аэрапорта Бельбек
Губернатар анексаванага Расіяй Севастопаля Міхаіл Разважаеў заявіў, што раніцай 4 студзеня ў раёне аэрапорта Бельбек былі збітыя два беспілотнікі.
Фота: Pixabay.com
Бельбек — вайсковы аэрадром, пасля анексіі Крыма ў 2014 годзе яго выкарыстоўваюць толькі расійскія ВКС.
«Раніцай сістэмы СПА збілі два БПЛА над морам у раёне Бельбека. Усе службы працуюць у штатным рэжыме», — напісаў Разважаеў у сваім тэлеграм-канале.
Разважаеў летась рэгулярна паведамляў аб нападах дронаў.
Таксама ў ноч на 4 студзеня з Растова-на-Доне паступалі паведамленні пра выбух. Супрацоўнік ВГТРК Андрэй Рудэнка пісаў у сваім тэлеграм-канале, што сістэмы СПА збілі ў небе над Растоўскай вобласцю неапазнаны аб'ект. Губернатар Растоўскай вобласці Васіль Голубеў заявіў, што сітуацыя «знаходзіцца пад кантролем», і заклікаў не паддавацца паніцы.
