Прэс-сакратар Эрдагана анансаваў размовы прэзідэнта Турцыі з Пуціным і Зяленскім
Рэджэп Таіп Эрдаган у сераду плануе правесці тэлефонныя размовы з прэзідэнтам Расіі Уладзімірам Пуціным і прэзідэнтам Украіны Уладзімірам Зяленскім, паведаміў прэс-сакратар Эрдагана Ібрагім Калын.
«Мы працягваем весці інтэнсіўную дыпламатыю з абодвума бакамі. Нашы профільныя міністры — міністр замежных спраў, міністр абароны, — кіраўнік разведкі і іншыя нашы калегі працягваюць сустракацца са сваімі калегамі з абодвух бакоў. У цяперашні час Турцыя з'яўляецца адзінай краінай, якая можа рабіць гэта з такой эфектыўнасцю і ў такіх маштабах», — сказаў ён у эфіры тэлеканала NTV.
Са слоў Калына, турэцкі бок непакоіць магчымая эскалацыя баявых дзеянняў ва Украіне, і Анкара па-ранейшаму выступае за перамовы Пуціна і Зяленскага.
«Адзіны стол міру і перамоваў, які з самага пачатку па-сапраўднаму аб'яднаў бакі, быў створаны ў Турцыі. Спачатку ў Антальі, затым у Стамбуле. На жаль, працягу не было, але, як вы ведаеце, наш прэзідэнт неаднаразова заклікаў да сустрэчы двух лідараў, і мы працягваем паўтараць гэты заклік», — дадаў Калын.
