Электронныя звароты ў дзяржаўныя органы цяпер будзе падаваць цяжэй
З 2 студзеня ў сувязі з уступленнем у сілу Закона «Аб зваротах грамадзян і юрыдычных асоб» у Беларусі змяніўся парадак падачы электронных зваротаў. Цяпер падаць электронны зварот у любы дзяржорган або дзяржарганізацыю можна толькі праз спецыяльны рэсурс і толькі ідэнтыфікаваным карыстальнікам.
Доступ да сістэмы ўліку і апрацоўкі зваротаў будзе арганізаваны на спецыяльным сайце.
Перад падачай электроннага звароту заяўніку неабходна ідэнтыфікавацца і аўтарызавацца ў сістэме з дапамогай:
- лагіна і пароля, створаных у працэсе рэгістрацыі ў сістэме. Пры гэтым прадугледжваецца абавязковае пацвярджэнне факта рэгістрацыі па нумары мабільнага тэлефона;
- уліковага запісу нацыянальнай паштовай электроннай сістэмы, які можна атрымаць у аддзяленні паштовай сувязі;
- сертыфіката адкрытага ключа або ID-карты пры іх наяўнасці.
Для юрыдычных асоб падчас праходжання працэдур ідэнтыфікацыі ў сістэме прадугледжваецца выкарыстанне толькі сертыфіката адкрытага ключа альбо ID-карты, якая належыць кіраўніку ці асобе, упаўнаважанай падпісваць звароты.
Адказы і апавяшчэнні на такія звароты таксама будуць накіроўвацца праз гэтую сістэму.