«Не атрымалі нічога, акрамя 15 касак». Канфлікт паміж палком Каліноўскага і Стрыжаком — што здарылася
Полк Каліноўскага абвінавачвае фонд «Байсол» у тым, што не атрымаў ад іх амаль ніякай дапамогі. Са справаздачы фонду вынікае, што не ўсё так адназначна.
Полк Каліноўскага выпусціў відэа, дзе кажа, што не супрацоўнічае з «Байсол», а фотаздымкі каліноўцаў той у зборах нібыта выкарыстоўвае без дазволу.
«За ўвесь час правядзення такіх збораў полк Каліноўскага не атрымаў ніякай дапамогі ад «Байсол», акрамя 15 касак», — заяўляюць у палку.
Фота: скрыншот відэа палка Каліноскага
Некаторыя беларускія байцы іншых падраздзяленняў, што ваююць ва Украіне, таксама сцвярджаюць, што не атрымалі абяцанай дапамогі.
«Мы не атрымлівалі дапамогі і грошай ад Стрыжака, апроч Ford Ranger», — каментуе ў гэтым жа відэа камандзір інтэрнацыянальнага батальёна «Тытан» Ігар «Янкі» Номан.
Нараканні ёсць у байцоў антыаўтарытарнага атраду і былога адэскага атраду імя Ліцвіна (з апошнім у каліноўцаў раней быў канфлікт, таксама праз валанцёрскую дапамогу).
Стрыжак на гэтыя абвінавачванні адрэагаваў у фэйсбуку.
«Сябры, хіба ўжо ўсе бачылі заяву палка Кастуся Каліноўскага, якая з'явілася на іх афіцыйным канале. І я хачу сказаць, што я запрашаю прадстаўнікоў палка Кастуся Каліноўскага да адкрытай і шчырай размовы. Я да гэтай размовы гатовы. Чакаем на адказ ад прадстаўнікоў палка Каліноўскага», — быў лаканічны сузаснавальнік фонда «Байсол».
Фонд рыхтаваў прамежкавую справаздачу па 100 днях вайны. З яе бачна, што на падтрымку беларускіх байцоў ва Украіне было сабрана 143,8 тысячы еўра, з іх выплачана 62,8 тысячы.
Са справаздачы вынікае, што адэскаму атраду «Ліцвін» перадалі Nissan Navara (за 8375 еўра). На Ford Ranger для батальёна Ігара «Янкі» пайшло 15,5 тысячы еўра. Для гэтага ж батальёна закуплены Mitsubishi Pajero IV за 10,8 тысячы еўра (аўто пакуль у працэсе дастаўкі).
Машына, перададзеная былому адэскаму атраду «Ліцвін». Фота: фонд «Байсол».
За кошт донарскай і партнёрскай дапамогі для палка Каліноўскага было закуплена 100 турнікетаў, 15 тактычных заплечнікаў, 20 кеўларавых шлемаў. З гэтых сродкаў таксама 2300 еўра матэрыяльнай дапамогі выдаткавалі атраду «Ліцвін».
Апроч гэтага ў справаздачы ёсць іншыя графы выдаткаў — на валанцёраў, медыкаў, полк «Пагоня».
