Памёр акцёр Ігар Андрэеў. Ён граў Быкава, удзельнічаў у пратэстах
Акцёр Горкаўскага тэатра Ігар Андрэеў памёр 6 ліпеня. Пра гэта расказалі яго сябры.
Ігар Андрэеў нарадзіўся ў 1952 годзе ў Мінску, скончыў Тэатральна-мастацкі інстытут як акцёр.
Большую частку жыцця працаваў у Горкаўскім тэатры — як акцёр (у 1970-я), намеснік і першы намеснік дырэктара.
З апошняй пасады сышоў летась і зноў працаваў акцёрам.
Таксама з’яўляўся дырэктарам сталічнага Тэатра юнага гледача (1985-1995) і Белдзяржфілармоніі (1999-2002).
Андрэеў меў прабеларускую пазіцыю. Ён супрацоўнічаў з «Белсатам», у фільме «Куля для КДБ ад Васіля Быкава» сыграў ролю класіка беларускай літаратуры.
«Быў шчаслівы ўвасобіць вобраз вялікага пісьменніка і чалавека», — пісаў у сацыяльных сетках Андрэеў.
У лістападзе 2020 года, калі праходзілі акцыі памяці Рамана Бандарэнкі, яго затрымлівалі разам з жонкай у цэнтры Мінска.
