Кавярні Менска: CoffeeBox 19

Кавярня CoffeeBox

ГЦ «Сталіца», пр. Незалежнасці, павільён 411

Ст. метро Плошча Перамогі, пр. Незалежнасці, 39

+375 17 227-29-23

Плошча Незалежнасці — месца, вядомае амаль кожнаму беларусу. Знакамітая гэтая плошча не толькі снежаньскімі падзеямі 2010-га, але і сваёй архітэктурнай выразнасцю. Дом урада Лангбарда, Чырвоны касцёл, ацалелыя прыбытковыя дамы на Савецкай, прыгожы фантан ды гандлёвы цэнтр «Сталіца» — вось што вабіць сюды мінчукоў і турыстаў. Менавіта пра адну з кавярняў у «Сталіцы» і пойдзе гаворка сёння.

Кавярня CoffeeBox, якая месціцца на найніжэйшым узроўні гандлёвага цэнтра «Сталіца», з’яўляецца прадстаўніком тыповага і ўжо даволі звыклага праекта для Заходняй Еўропы: сціплы, але прыгожы інтэр’ер, самаабслугоўванне і наяўнасць Wi-Fi — вось тры кіты, на якіх трымаюцца ўстановы такога кшталту. Звычайна яны арыентаваныя на моладзь, а менавіта студэнтаў, у якіх кава і інтэрнэт шчыльна ўвайшлі ў культуру працы і адпачынку.

Што ўнутры?

Нельга сказаць, што інтэр’ер вылучаецца непаўторнасцю: лёгкія прыглушаныя колеры, недарагая мэбля, мноства фотаздымкаў на сценах — карацей кажучы, надзейны і правераны на іншых установах варыянт. Але ёсць і тое, што вылучае CoffeeBox з гэтага шэрагу — шматлікія паліцы, з якіх кожны можа ўзяць шахматы, даміно і іншыя настольныя гульні. Да кавы магчыма падабраць цікавую кнігу, якую потым нават дазволена панесці дадому (пры ўмове, што вы пакінеце ў кавярні не менш цікавую замену). Прыемна, што сусветна вядомая з’ява пад назвай бук-кросінг добра прыжылася і ў Мінску.

Што па цэнах?

Цэны ў CoffeeBox больш «еўрапейскія», чым «дэмакратычныя». Той выпадак, калі два гэтыя словы не ўжываюцца разам і маюць абсалютна розны сэнс.

Вось некаторыя прыклады:

Эспрэса — 10 890

Амерыкана (120 г, 240 г) -12 120, 20 260 р Латэ (200 г, 300 г, 400 г) -16 390, 18 610, 25 980.

Айс кава — 23 010

Да кавы гасцям прапануюцца розныя даволі смачныя кандытарскія вырабы ад 4 500 да 8 500 руб.

Маё меркаванне

CoffeeBox — гэта кавярня, дзе прыемна прабавіць першую палову дня. Трэба зайсці, каб паглядзець на фотавыставы, якія там часам ладзяцца, пагуляць у даміно або пачытаць «Нашу Ніву» пад кубачак смачнай кавы. Не мае сэнсу, калі вы шукаеце арыгінальнасці або «пад ціскам» эканоміі.

* * *

Зваротная сувязь з аўтарам: [email protected].

Андрэй Макаёнак

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ