Падчас старшынства ў АБСЕ Ірландыя будзе спрабаваць прадоўжыць дыялог з Беларуссю 3

Падчас свайго старшынства ў АБСЕ Ірландыя будзе спрабаваць прадоўжыць дыялог з Беларуссю. Пра гэта заявіў намеснік прэм`ер-міністра, міністр замежных спраў Ірландыі Эйман Гілмар 7 снежня на прэс-канферэнцыі ў Вільні.

«Падчас нашага старшынства мы будзем працаваць над тым, каб забяспечыць кантакты і працяг дыялогу з Беларуссю», — сказаў кіраўнік ірландскага МЗС.

Каментуючы прапанову выключыць Беларусь з АБСЕ, якая ўтрымліваецца ў рэзалюцыі Канферэнцыі грамадзянскай супольнасці АБСЕ ад 6 снежня, Гілмар адзначыў: усе рашэнні арганізацыі прымаюцца на аснове кансэнсусу. А па некаторых пытаннях «бывае даволі складана дамовіцца», дадаў ён.

Пры гэтым Гілмар нагадаў, што Ірландыя, як член Еўрасаюза, поўнасцю падтрымала ўсе санкцыі, уведзеныя ЕС у дачыненні да Беларусі.

У гутарцы з карэспандэнтам БелаПАН кіраўнік ірландскага МЗС падкрэсліў:

ён усё яшчэ ўражаны і заклапочаны тым, што адбылося ў Беларусі пасля 19 снежня 2010 года.

«А з-за таго, што ў Мінску быў закрыты офіс АБСЕ, нам у прынцыпе вельмі цяжка весці які-небудзь дыялог», — сказаў ён.

Ірландыя будзе старшынстваваць у АБСЕ з пачатку 2012 года. Цяпер старшынёй арганізацыі з`яўляецца Літва.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ