Нацыянальны банк Беларусі агучыў папярэднія лічбы аб’ёму золатавалютных рэзерваў Беларусі на 1 красавіка. Згодна з пададзенай інфармацыяй, рэзервы ў вызначэнні МВФ зменшыліся на $262,3 мільёна і апусціліся да паказчыку $3761,3 мільёна.
Асноўнай прычынай зніжэння аб’ёму золатавалютных рэзерваў у сакавіку Нацбанк небеспадстаўна называе высокі попыт на замежную валюту з боку насельніцтва.
За мінулы месяц чыстая купля насельніцтвам замежнай валюты (наяўнай і безнаяўнай) склала $768,1 мільёна.Гэта розніца паміж купляй і продажам.
У выніку атрымліваецца дзіўная розніца ў паўмільярды (паміж $768 мільёнамі прададзенай валюты і падзеннем рэзерваў усяго на $262 мільёны). Як яе кампенсаваў Нацбанк? За апошні месяц было заяўлена хіба што толькі пра выдзяленне Беларусі крэдыту памерам $400 мільёнаў на рамонт дарог. Але гэтыя грошы яшчэ не былі атрыманыя. Новых еўрабондаў таксама размешчана не было… Тады рытарычнае пытанне —
адкуль узятая статыстыка?
У найбліжэйшы час Нацбанк дадаткова паведаміць пра аб’ём золатавалютных рэзерваў у замежнай валюце. Арыенціровачна яны складуць усяго каля мільярда даляраў. Гэта стане найгоршым паказчыкам за апошнія чатыры гады.
Што да агульнага памеру рэзерваў, то гэта найгоршы вынік з кастрычніка 2009 года.
Варта адзначыць, што ўзровень золатавалютных запасаў у Беларусі ў прапорцыі да ВУП застаецца адным з найніжэйшых у Еўропе. Ён вышэйшы нават у беднай Малдове.
Валютныя запасы — гэта свайго роду падушка бяспекі для эканомікі. МВФ рэкамендуе, каб яны складалі не менш за вартасць 3-месячнага аб’ёму імпарту краіны. Між тым беларускія рэзервы скурчыліся да памеру месячнага аб'ёму імпарту з невялікім. Напрыклад, у студзені імпарт склаў $2471,2 мільёна.
