Стаўкі па крэдытах падскочылі да 18,5% 1

Рост крэдытных ставак, праблемы з валютай, чуткі пра блізкую дэвальвацыю могуць істотна нашкодзіць рынку нерухомасці, і ў першую чаргу сектару жылля,

які толькі-толькі пачаў ачуньваць пасля ўзрушэнняў, выкліканых фінансавым крызісам 2008 г.

Знізіўшыся да дакрызіснага ўзроўню, стаўка рэфінансавання з 16 сакавіка падскочыла аж на 1,5 працэнтных пункты (п. п.). Услед за ёй у большасці банкаў выраслі на 0,5–1,5 п. п. стаўкі па крэдытах, якія даюцца на куплю і будаўніцтва жылля. А ў канцы сакавіка некаторыя банкі і зусім прыпынілі прыём заяваў на атрыманне крэдытаў, якія даюцца на куплю або будаўніцтва жылля.

Так, у сувязі з карэктаваннем стаўкі рэфінансавання ў Белзнешэканамбанку крэдыты на фінансаванне нерухомасці (будаўніцтва, набыццё, абмен кватэраў або індывідуальных жылых дамоў) даюцца з 16 сакавіка па стаўках ад 17,5 да 18,5% гадавых (рост на 1,5 п. п.).

У Беларусбанку крэдыты на будаўніцтва і набыццё жылля, а таксама на будаўніцтва кватэраў у жылых дамах, якое прадугледжвае сумеснае будаўніцтва машына-месца ў падземным гаражы-стаянцы, па-ранейшаму даюцца пад 14,5% — асобам, якія маюць патрэбу ў паляпшэнні жыллёвых умоваў, і 17% гадавых — тым, хто не жыве ў нястачы.

Адзінае змяненне, якое ўсё ж такі адбылося, закранула крэдыты, якія прадстаўляюцца шматдзетным сем’ям-чаргавікам. Для іх стаўка па крэдыце павялічылася з 16 сакавіка да 12% гадавых, бо прывязаная да стаўкі рэфінансавання.

Як паведамілі ў Беларусбанку, у апошнія дні сакавіка ніякіх абмежаванняў па выдачы крэдытаў, ніякіх зменаў у парадак выдачы крэдытаў банк не ўводзіў і пакуль уводзіць не збіраецца

.

Працэнтныя стаўкі ў БПС-банку павялічыліся з 16 сакавіка на 1,5 п. п.: з 14 да 15,5% — для чаргавікоў, з 16 і 17 да 17,5 і 18,5% — для нечаргавікоў. Стаўкі па спецпраграме істотна ніжэйшыя.

Аднак варта мець на ўвазе, што БПС-Банк з 28 сакавіка часова не прымае дакументы на атрыманне крэдытаў ад грамадзян, якія маюць патрэбу ў паляпшэнні жыллёвых умоваў.

Прыёрбанк павялічыў стаўку па зноў выдаваных крэдытах з ранейшых 17,9% да 18,5% гадавых. Як паведамілі ў службе кліенцкай падтрымкі, ніякіх мераў абмежавальнага характару ў банку ў апошнія дні сакавіка не рабілася, аднак пры гэтым павялічыліся тэрміны разгляду заявак на атрыманне крэдытаў.

У Белінвестбанку працэнтныя стаўкі таксама падраслі. Для чаргавікоў крэдыты прапануюцца пад 15% гадавых. Для астатніх фізічных асобаў — пад 17,5%. Раней стаўкі складалі 13,5 і 16% гадавых.

У Парытэтбанку працэнтныя стаўкі засталіся на ранейшым узроўні — ад 15,5 да 19% гадавых, у залежнасці ад тэрміну крэдытавання.

У Белгазпрамбанку па-ранейшаму дзейнічаюць дзве праграмы крэдытавання для тых, хто хоча набыць нерухомасць. Крэдыты выдаюцца па стаўках 15 і 16% гадавых пасля заключэння і рэгістрацыі дамовы іпатэкі і па стаўках 17 і 18% — у перыяд да заключэння і рэгістрацыі іпатэчнай дамовы.

Белрасбанк дае крэдыты па стаўках ад 15,5% гадавых (да 16 сакавіка было ад 15%).

Белаграпрамбанк з 28 сакавіка наогул не крэдытуе набыццё нерухомасці. Крэдыты на будаўніцтва кватэраў і дамоў банк выдае пад 15,5% для тых, хто мае патрэбу ў паляпшэнні жыллёвых умоваў, пад 18,5% — для астатніх.

Калі б не праблемы на валютным рынку, то падвышэнне стаўкі рэфінансавання і, як вынік, падаражанне крэдытаў не змаглі б моцна паўплываць на сітуацыю на рынку жылля. Але дэфіцыт даляраў, у якіх фіксуюцца кватэрныя цэны, множнасць курсаў і чаканне дэвальвацыі, якой, па запэўненні Нацбанка, не будзе, ужо пачынаюць рабіць сваю чорную справу.

Першым на праблемы валютнага характару адрэагаваў рынак камерцыйнай нерухомасці. Яшчэ ўчора кліенты гатовыя былі заключаць пагадненні, а сёння адмаўляюцца ад іх, наракаюць мінскія рыэлтары. А колькасць зваротаў у агенцтвы нерухомасці скарацілася ў разы за апошнія некалькі тыдняў.

На кватэрным рынку з’явілася нервовасць. У пакупнікоў пачалі ўзнікаць цяжкасці пры атрыманні крэдытаў. Ёсць праблемы з канвертаваннем валюты. Ды і ахвотных купіць жыллё стала менш.

Калі Нацбанк і ўрад усё ж такі наважацца на разавую дэвальвацыю, то пакупнікам і прадаўцам варта рыхтавацца да зніжэння цэнаў на гатовыя кватэры як мінімум на памер дэвальвацыі на працягу першых двух-трох месяцаў пасля яе правядзення.

Што да цэнаў на жыллё, якое будуецца, то ў пераліку на даляры яны адназначна знізяцца ў выпадку дэвальвацыі. Цэны ў беларускіх рублях будуць расці паступова, прапарцыйна афіцыйнаму індэксу цэнаў у будаўніцтве — гэта значыць, на 1,5–2% у месяц як мінімум.

belaruspartisan.org

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ