У сталічным парку Горкага ў суботу, 19 сакавіка, грамадскае аб’яднанне абароны жывёл «Эгіда» правядзе акцыю па раздачы бяздомных жывёл.
Акцыю вырашана правесці ў сувязі з тым, што валанцёры «Эгіды» за зіму прытулілі вялікую колькасць сабак і катоў, якім трэба знайсці гаспадароў.
Усяго падчас акцыі, якая пачнецца ў 13.00, будуць прадстаўленыя 70 сабак і 30 катоў. Усе дарослыя жывёлы прышчэпленыя і стэрылізаваныя, маюць пашпарты, шчанюкі і кацяняты — даведку аб тым, што яны здаровыя.
Той, хто жадае забраць жывёлу, павінен мець пры сабе пашпарт. Будучыя гаспадары сабак павінны таксама прынесці нашыйнік, ланцужок, а ахвотныя ўзяць котку — пераноску.
Падчас акцыі ў парку будзе працаваць намёт, куды ўсе ахвотныя змогуць здаць харчаванне, лекі, сродкі дагляду за бяздомнымі жывёламі для «Эгіды».
Падчас акцыі адбудзецца канцэрт мастацкай самадзейнасці, паказ сабачай моды.
