Дырэктар радыёстанцыі расказаў пра бліжэйшыя планы рэдакцыі, салідарнасць калегаў і міжнародны розгалас.
Юрый Базан у рэдакцыі «Аўтарадыё». Фота Photo.bymedia.net
«На дадзены момант мы рыхтуем пазоў у Вышэйшы гаспадарчы суд, вычытваем кожны пункт, кансультуемся. Думаю, у панядзелак мы падамо яго ў суд», — расказаў «Нашай Ніве» дырэктар «Аўтарадыё» Юрый Базан. Нагадаем, што 11 студзеня Рэспубліканская камісія па тэлебачанні і радыёвяшчанні анулявала права «Аўтарадыё» на наземнае эфірнае радыёвяшчанне ў сувязі з невыкананнем ёй «творчай канцэпцыі і распаўсюджваннем у эфіры інфармацыі, якая змяшчае публічныя заклікі да экстрэмісцкай дзейнасці».
«Гэта нелегітымнае рашэнне»
Юрый Базан упэўнены, што рашэнне камісіі памылковае: «Мы ўважліва азнаёміліся з Законам аб друку, вывучылі палажэнні, якія датычаць адказнасці за распаўсюд экстрэмісцкай інфармацыі. Згодна закону, рашэнне аб закрыцці радыёстанцыі можа прыняць толькі суд. І толькі суд можа вызначыць, што з’яўляецца экстрэмісцкай інфармацыяй».
На думку дырэктара «Аўтарадыё», Камісія па тэлебачанні і радыёвяшчанні фактычна прысвоіла сабе паўнамоцтвы суда, зачыніўшы радыёстанцыю сваім рашэннемі не парупіўшыся нават пра тое, каб расшыфраваць абгрунтаванне такога радыкальнага кроку. «Гэта нелегітымнае рашэнне і мы будзем яго аспрэчваць».
Спадар Базан лічыць, што рашэнне аб закрыцці радыёстанцыі нанесла яе рэпутацыі вялікую шкоду. «У нас яшчэ не было падобных прэцэдэнтаў, але на Захадзе мы маглі б разлічваць на істотную кампенсацыю».
«Мы — непалітычнае радыё»
Абскарджванне рашэння камісіі ў ВГС магчыма зойме не адзін месяц. Рэдакцыя «Аўтарадыё» не будзе сядзець на месцы ўвесь гэты час. «Нашы наступныя дзеянні будуць мець форму зваротаў. Мы — непалітычнае радыё. Мы займаліся раскруткай беларускай музыкі. Многія гурты, што дэбютавалі ў нас, рабіліся айчыннымі „зоркамі“.
Нам тэлефануюць цяпер маладыя музыкі, пытаюць, куды ім цяпер несці запісы.Перакананы, што адбылася памылка, недарэчная памылка». Разам з тым, спадар Базан падкрэслівае, што трэба мець мужнасць прызнаваць свае памылкі. Тым больш, што ўлады любяць нагадваць, што Беларусь — прававая дзяржава. «То давайце і вырашым пытанне ў рамках права». Дырэктар спадзяецца, што магчыма праблему вырашыць выканаўчая ўлада — Саўмін, або Адміністрацыя прэзідэнта.
Маўчанне
За апошнія тры дні ў рэдакцыі «Аўтарадыё» ў літаральным сэнсе не зачыняліся дзверы. «У нас былі і беларускія журналісты, і калегі з Расіі. Запісалі інтрэв’ю некалькі еўрапейскіх тэлеканалаў. Урэшце я сказаў сваім калегам, што інтрэв’ю — гэта добра, але трэба ўжо штосьці рабіць, рыхтаваць дакументы, ратаваць радыёстанцыю», — смяецца Юрый Базан.
А што іншыя беларускія
Калі гаварыць пра кіраўніцтва радыёстанцый, то бок афіцыйную рэакцыю на сітуацыю вакол нас, то ніводная fm-станцыя не адгукнулася.Калі ж гаворка пра простых супрацоўнікаў радыё, то нам многія тэлефанавалі. Некалькі чалавек сказалі, што звольніліся з працы пасля закрыцця нашай радыёстанцыі», — расказаў кіраўнік «Аўтарадыё».
