ААН

Генеральны сакратар ААН Антоніу Гутэрыш назваў абвяшчэнне Пуціным вайны Украіне «самым сумным момантам у працы». Члены Рады Бяспекі ААН асудзілі расийскага лідара за «несправакаваныя і неапраўданыя» дзеянні.

«Гэта самы сумны момант у маім знаходжанні на пасадзе генеральнага сакратара Арганізацыі Аб'яднаных Нацый. Я пачаў гэтае пасяджэнне Рады бяспекі, звяртаючыся да прэзідэнта Пуціна і кажучы яму ад усяго сэрца: спыніце наступ вашых войскаў на Украіну, дайце шанец міру, таму што занадта шмат людзей загінула», — сказаў Гутэрыш журналістам у штаб-кватэры ААН, калі ён выйшаў з надзвычайнага пасяджэння Рады Бяспекі па Украіне позна ўвечары ў сераду.

«Я павінен сказаць, прэзідэнт Пуцін: дзеля чалавенасці вярніце свае войскі ў Расію. Дзеля чалавечнасці, не дазваляйце пачаць у Еўропе тое, што можа стаць найгоршай вайной з пачатку стагоддзя, з наступствамі не толькі разбуральнымі для Украіны, не толькі трагічнымі для Расійскай Федэрацыі, але і для ўсяго свету», — сказаў ён.

Кіраўнік ААН заявіў, што наступствы атакі мы нават не можам прадбачыць.

«У той момант, калі мы выходзім з пандэміі кавіду, і таму шматлікім краінам, якія развіваюцца, абсалютна неабходна мець прастору для аднаўлення, што было б вельмі і вельмі складана з высокімі цэнамі на нафту, са спыненнем экспарту пшаніцы з Украіны і з ростам працэнтных ставак, выкліканых нестабільнасцю на міжнародных рынках», — сказаў ён.

ЗША

Спецыяльную заяву выпусціў прэзідэнт Амерыкі Джо Байдэн.

«Сёння ўвечары малітвы ўсяго свету з народам Украіны, які пакутуе ад несправакаванага і неапраўданага нападу расійскіх узброеных сіл. Прэзідэнт Пуцін абраў наўмысную вайну, якая прывядзе да катастрафічных чалавечых ахвяр і чалавечых пакут. Толькі Расія нясе адказнасць за гібель і разбурэнні, якія прынясе гэты напад, і Злучаныя Штаты, іх саюзнікі і партнёры адкажуць адзіным і рашучым чынам. Свет прыцягне Расію да адказнасці.

Сёння вечарам я буду сачыць за сітуацыяй з Белага дома і буду працягваць атрымліваць рэгулярныя абнаўлення ад маёй каманды па нацыянальнай бяспецы. Заўтра я сустрэнуся з маімі калегамі па G7 раніцай, а затым звярнуся да амерыканскага народа, каб абвясціць аб далейшых кроках, якія Злучаныя Штаты, нашы саюзнікі і партнёры распачнуць у дачыненні да Расіі за гэты непатрэбны акт агрэсіі супраць Украіны і глабальнага міру і бяспекі.

Мы таксама будзем каардынаваць свае дзеянні з нашымі саюзнікамі па НАТА, каб забяспечыць рашучы, адзіны адказ, які прадухіліць любую агрэсію супраць Паўночнаатлантычнага альянсу. Сёння вечарам мы з Джыл молімся за адважны і горды народ Украіны», — гаворыцца ў заяве прэзідэнта Злучаных Штатаў.

Нямеччына

Федэральны канцлер Нямеччыны Олаф Шольц назваў дзень пачатку вайсковай агрэсіі Масквы супраць Кіева «жахлівым днём для Украіны і змрочным днём для Еўропы». Адпаведную заяву кіраўнік германскага ўрада зрабіў у чацвер, 24 лютага, у Берліне.

Па словах Олафа Шольца, гаворка ідзе аб «абуральным парушэнні міжнароднага права». Расійская атака была «нічым не апраўданая», указаў ён. «Расія павінна неадкладна спыніць гэтыя ваенныя дзеянні», — запатрабаваў Шольц. Паводле яго слоў, Германія салідарная з Украінай і яе народам.

Міністр замежных спраў Аналена Бербак рашуча асудзіла ваенныя дзеянні супраць Украіны. «Сваім нападам на Украіну Расія парушае самыя элементарныя правілы міжнароднага парадку. Міжнародная супольнасць не забудзе пра гэты дзень ганьбы Расіі», — заявіла кіраўніца нямецкага знешнепалітычнага ведамства.

Краіны Балтыі

Кіраўнікі МЗС краін Балтыі рэзка асуджаюць дзеянні Расіі ва Украіне і заклікаюць да жорсткіх санкцый супраць агрэсара, у тым ліку да адключэння ад сістэмы SWIFT.

«Мы, міністры замежных спраў Эстоніі, Латвіі і Літвы, рашуча асуджаем шырокамаштабную агрэсію Расіі супраць незалежнай, мірнай і дэмакратычнай Украіны», — гаворыцца ў заяве. На думку міністраў, дзеянні Расіі непрымальныя і груба парушаюць міжнароднае права і нормы, што з'яўляецца злачынствам супраць украінскага народа. «Мы ўсе ў міжнароднай супольнасці павінны рашуча асудзіць гэтыя дзеянні і ўвесці супраць Расіі самыя жорсткія санкцыі, уключаючы адвязку ад SWIFT, палітычную ізаляцыю», — заявілі міністры.

Па іх словах, неабходна тэрмінова даць Украіне ўзбраенне, боепрыпасы і іншую ваенную дапамогу, а таксама эканамічную і гуманітарную дапамогу.

Аўстралія

Урад Аўстраліі ахарактарызаваў дзеянні Расіі ва Украіне як «абуральныя» і заклікаў Маскву неадкладна вывесці свае войскі. «Мы абмяркоўваем аднабаковыя варожыя дзеянні ва Украіне. Расія адкрыта парушае міжнароднае права і Статут ААН», — заявіў прэм'ер-міністр Скот Морысан. «Расія абрала шлях вайны», — дадаў ён.

Брытанія

Прэм'ер-міністр Вялікабрытаніі Борыс Джонсан выказаў свой «жах перад катастрафічнымі падзеямі ва Украіне». Ён абмеркаваў з Зяленскім далейшыя крокі, паведаміў кіраўнік Кабміна ў Twitter. «Прэзідэнт Пуцін абраў шлях кровапраліцця і разбурэння», — рэзюмаваў ён.

Ізраіль

Міністэрства замежных спраў Ізраіля проста адзначыла ў заяве, што канфлікт уступіў у «новую і цяжкую стадыю», і загадала прыкладна 8000 грамадзянам Ізраіля ва Украіне пакінуць краіну праз наземныя пераходы на захадзе краіны. Міністэрства пазбягала нават згадкі Расіі ў заяве ў сераду, заявіўшы толькі, што «Ізраіль падтрымлівае тэрытарыяльную цэласнасць і суверэнітэт Украіны».

Італія

Прэм'ер-міністр Італіі Марыё Драгі далучыўся да асуджэння ўварвання Расіі ва Украіну.

Драгі сказаў:

«Італьянскі ўрад асуджае напад Расіі на Украіну. Гэта неапраўдана. Італія блізкая ўкраінскаму народу і органам улады ў гэты драматычны момант. Мы працуем з еўрапейскімі саюзнікамі і саюзнікамі па НАТА, каб адрэагаваць неадкладна і рашуча».

Грэцыя

Прэм'ер-міністр Грэцыі Міцатакіс склікаў тэрміновае пасяджэнне Нацыянальнага савета па замежных справах і абароне, каб абмеркаваць уварванне і тое, як найлепшым чынам абараніць этнічных грэкаў, якія пражываюць ва Украіне.

Іспанія і Партугалія

Іспанія і Партугалія асудзілі напад Расіі на Украіну, піша Сэм Джонс у Мадрыдзе.

Прэм'ер-міністр Іспаніі Пэдра Санчас напісаў у Твітары: «Урад Іспаніі асуджае агрэсію Расіі супраць Украіны і выказвае сваю салідарнасць з украінскім урадам і яго народам. Я застаюся ў цесным кантакце з нашымі партнёрамі і саюзнікамі ў Еўрапейскім саюзе і НАТА, каб каардынаваць нашы дзеянні ў адказ».

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру