Абвінавачаны быў заснавальнікам і дырэктарам некалькіх фірмаў. З верасня 2016 года па люты 2019 ён узяў у доўг пад дагавор пазыкі ў шасці пацярпелых 700 тысяч даляраў для канцэртнай дзейнасці і будаўніцтва. Пры гэтым яго мэтай было завалодаць 1,1 мільёна даляраў. Для ўвядзення ў зман і надання законнасці сваім дзеянням ён заключыў з пацярпелымі ад свайго імя і ТАА «Д.» дагаворы пазыкі, як паведамляе Генпракуратура.
Ён жа са жніўня 2018 года да верасня 2019 года склаў і падпісаў ад імя заснавальніка і двух работнікаў дамовы аб выдачы пазык — гэта дазволіла яму на падставе падробленых дакументаў атрымаць больш за 800 тысяч рублёў, якія належалі прадпрыемству.
Даведаўшыся аб запланаваным на лістапад 2019 года турах музычнага гурта Scorpions па гарадах Расіі і Украіны, абвінавачваны прапанаваў арганізатару канцэртаў правесці канцэрт 15 лістапада 2019 года на «Мінск-арэне» і аформіць для гэтага кантракт. Дзякуючы гэтаму 180 тысяч рублёў, атрыманых ад рэалізацыі білетаў на Scorpions, паступілі на рахунак яго фірмы.
Мінчук таксама абвінавачваецца ў замаху на махлярства. Па матэрыялах справы, у мінулым годзе ён прапанаваў арганізатару фестывалю ў Шчучыне правесці канцэрт аднаго гурта. Для гэтага ён пераканаў пацярпелага перадаць яму 5 тысяч еўра перадаплаты (агульная сума ганарару складала 33 тысячы еўра), якую, паводле дамовы, быў абавязаны вярнуць у выпадку, калі выступ не адбудзецца.
Апошні эпізод у крымінальнай справе прадпрымальніка — гэта падбухторванне да дачы хабару. Абвінавачаны разам з партнёрам схіляў іншага бізнэсмена перадаць ім 1,8 мільёна даляраў нібыта для перадачы хабару службовым асобам розных узроўняў для вырашэння пытання аб выдзяленні зямельнага ўчастка пад будаўніцтва жылога дома.
Ад запытанай сумы пацярпелы перадаў толькі 75 тысяч даляраў. У той жа дзень абвінавачаных затрымалі.
Усе атрыманыя незаконным шляхам грошы абвінавачаны траціў на свае мэты і не збіраўся выконваць узятыя на сябе абавязацельствы.
Мужчыну выставілі абвінавачванне па артыкулах аб махлярстве, крадзяжы шляхам злоўжывання службовымі паўнамоцтвамі, а таксама аб падбухторванні да дачы хабару.
Крымінальная справа накіравана ў суд.
