Фота the18.com
Бельгійскі паўабаронца Тарган Азар шмат чаго дабіўся ў футбольнай кар’еры. Ён гуляе ў дортмундскай «Барусіі», якая з’яўляецца адным з найлепшых нямецкіх клубаў, таксама быў удзельнікам футбольнага чэмпіянату свету — 2018 у Расіі і разам з камандай атрымаў там бронзу. Але аматары футбола ўсё роўна больш ведаюць імя брата Таргана — Эдэна, гульца славутага мадрыдскага «Рэала».
Увечары 27 чэрвеня Тарган усё ж такі здолеў гучна нагадаць пра сябе. У гульні плэй-оф чэмпіянату Еўропы супраць Партугаліі, на 42-й хвіліне, ён забіў прыгожы гол — паглядзіце самі:
Дзякуючы гэтаму Бельгія прайшла ў чвэрцьфінал Еўра, дзе 2 ліпеня сустрэнецца з Італіяй, а іх супернік Партугалія на чале з самім Крышціяну Раналду, адным з найлепшых гульцоў сучаснасці, адправілася дахаты. Яшчэ больш цікава тое, што ўдар Таргана Азара выбіў з Еўра дзейных чэмпіёнаў Еўропы: Партугалія ўзяла гэты тытул на мінулым чэмпіянаце 2016 года.
Здаецца, і ў Таргана, і ў Эдэна не было іншага шляху ў жыцці, акрамя футбола, бо ў сям’і Азараў усё звязанае з гэтай гульнёй. Нават матуля хлопцаў, Карын, некалі гуляла ў футбол і была нападаючай у адной з жаночых каманд бельгійскага першага дывізіёна. Натуральна, што свайго мужа, Цьеры, яна таксама сустрэла на стадыёне: як сведчыць легенда, гэты паўпрафесійны гулец прыйшоў паглядзець на дзяўчат.
Карын была першай, хто адмовіўся ад футбола на карысць сям’і. Яна сышла са спорту ва ўзросце 26 год, на чацвёртым месяцы цяжарнасці Эдэнам, сваім старэйшым сынам. Бацька хлопцаў, Цьеры, нейкі час яшчэ працаваў настаўнікам фізічнай культуры ў школе, але потым пакінуў працу, каб прысвячаць дзецям больш часу.
Усяго ў сям’і Азараў чацвёра дзяцей, усе яны — хлопцы. Іх дзяцінства праходзіла ў невялікім бельгійскім горадзе Брэн-лё-Контэ. Азары жылі зусім недалёка ад футбольнага поля, і браты часта бегалі туды, каб ладзіць сабе трэніроўкі — а каб трапіць на поле, пралазілі праз дзірку ў агароджы. Натуральна, што браты гулялі ў футбол і ва ўласным сямейным дворыку, і Тарган нават распавядаў журналістам, што тыя гульні — яго найлепшыя дзіцячыя ўспаміны.
Тры браты Азары — Тарган, Кіліян і Этан. Фота lifebogger.com
А яшчэ хлопцы фанацелі ад зорнага французскага нападаючага Зінэдзіна Зідана, які якраз у канцы дзевяностых (калі дакладней — у 1998 годзе) разам са сваё зборнай стаў чэмпіёнам свету. Цікава, што пазней старэйшы з братоў, Эдэн, адгуляў два гады ў мадрыдскім «Рэале» якраз пад кіраўніцтвам свайго куміра.
Да «Рэала» ў жыцці Эдэна быў англійскі «Чэлсі», куды ён пераходзіў у 2012 годзе разам з братам Тарганам. Эдэн затрымаўся ў клубе на сем год і за гэты час сабраў з ім россып узнагарод — варта ўспомніць хаця б два тытулы пераможцы Лігі Еўропы і два чэмпіёнствы ў англійскім чэмпіянаце. Тарган жа, у сваю чаргу, не здолеў ні разу выйсці на поле ў афіцыйным матчы за «Чэлсі» і трапіў замест гэтага ў бельгійскі клуб «Зюлтэ-Варэгем». Нарэшце, два гады таму ён апынуўся ў дортмундскай «Барусіі» — на сёння самым выбітным клубе за ўсю яго кар’еру.
Эдэн Азар. Фота elartedf.com
Трэці з братоў Азараў, 25-гадовы Кіліян, таксама спрабаваў замацавацца ў «Чэлсі», але ў выніку апынуўся ў бельгійскім клубе «Сэркль Бруге». Гэта старая каманда, што некалькі разоў выйгравала чэмпіянат краіны і нацыянальны футбольны кубак — праўда, з часоў апошняга вялікага трафея гэтага клуба прайшло ўжо 35 год. Нарэшце, наймалодшы з Азараў, 17-гадовы Этан, зараз гуляе за бельгійскі клуб «Цюбіз».
Насамрэч, у гэтай сям’і ёсць і іншыя цікаўнасці, акрамя футбола. Распавядаюць, напрыклад, што ў дзяцінстве браты Азары вельмі любілі разам ездзіць на веласіпедах. Вядома, што сярод продкаў Азараў ёсць арабы, і часам у сеціве пішуць пра схільнасць братоў да ісламу.
Некалі журналісты разведалі дэталі старой спрэчкі паміж Эдэнам і Тарганам Азарам — маўляў, хто на канец сезона забівае менш галоў у сваім чэмпіянаце, той і аплачвае сумесную вячэру. Цікава, як на гэтыя правілы паўплывае цудоўная гульня Таргана ў плэй-оф Еўра?
