Чаму сілавікі атакавалі Tut.by?
Камітэт дзяржаўнага кантролю палічыў, што кіраўніцтва ТАА «Тут бай медыя» парушыла падатковае заканадаўства. Справа ў тым, што ў 2019 годзе кампанію зарэгістравалі як рэзідэнта Парка высокіх тэхналогій. Пасля гэтага кампанія стала плаціць меншыя падаткі. Цяпер жа КДК вырашыў, што «Tut.by атрымліваў выручку, не абумоўленую дзейнасцю, дазволенай для рэзідэнтаў ПВТ». Тым самым, маўляў, дзяржаве былі нанесеныя страты ў асабліва буйным памеры.
Калі гэта нібыта эканамічная справа, то чаму Tut.by заблакавалі?
Мінінфарм у гэты ж дзень заявіў, што Tut.by распаўсюджваў інфармацыю ад фонду салідарнасці «Байсол». Той не мае рэгістрацыі ў Беларусі (хоць зарэгістраваны за мяжой). Чыноўнікі палічылі, што гэтага дастаткова для блакіроўкі.
Хто стаў фігурантам справы?
У паведамленні КДК згадваюцца дырэктар ТАА «Тут бай медыя» Людміла Чэкіна і галоўны бухгалтар Анжэла Асад. Ім інкрымінуецца ўхіленне ад сплаты падаткаў у асаблівай буйным памеры — пакаранне ад хіміі на паўгода да калоніі на 7 гадоў.
Пісалі, што ператрусы праходзяць дома ў многіх журналістаў. А што з імі?
Незразумела. Некаторыя з іх (у тым ліку галоўны рэдактар Марына Золатава і палітычны журналіст Алена Талкачова) паспелі паведаміць, што маюць статус сведак, пасля чаго іх увезлі на допыты. У іншых (рэдактары Ганна Рудэнка і Вольга Саўкіў) канфіскавалі тэхніку і сказалі чакаць павестку. Тыя супрацоўнікі, хто ад раніцы знаходзіўся ў офісе, па-ранейшаму не выходзяць на сувязь.
ДФР прыходзіў і да культуролага Юліі Чарняўскай, удавы заснавальніка Tut.by Юрыя Зісера. Ёй стала дрэнна, яна знаходзіцца ў бальніцы.
Хто яшчэ трапіў пад удар?
Сілавікі прыйшлі ў шэраг бізнэсаў, афіліяваных з Tut.by. Гэта правайдар Hoster.by, тэхнічны аператар беларускай інтэрнэт-зоны, гэта найбуйнейшая аўтабарахолка краіны Av.by, гэта сэрвісы Rabota.by, Tam.by. Іх кіраўнікі таксама затрыманыя, іх прававы статус пакуль невядомы.
Як цяпер будзе працаваць Tut.by?
Ствараць люстэркі заблакаванага сайта пакуль выглядае бессэнсоўным — яны блакуюцца адразу ж.
Tut.by можна чытаць у тэлеграме і ў інстаграме:
- https://t.me/tutby_official
- https://www.instagram.com/tutbylive/
Каментар «Нашай Нівы»: Да чаго прывядзе разгром Тутбая? Чатыры наступствы
