Надзея Філіпчык. Фота з асабістага архіва
Дык вось — паўторны кавід сапраўды існуе. На жаль, мне давялося праверыць гэта на ўласным досведзе, пацверджаным і вынікамі тэстаў, і сімптомамі, і наступствамі.
Чытайце таксама: Кавід застанецца з намі надоўга, а можа і навечна. Як гэта зменіць наша жыццё і звычкі
Кавід мае наступствы нават пасля бессімптомных выпадкаў
Як адчуванні? Распыталі першых беларусаў, якія прышчапіліся ад каранавіруса
Прышчэпленыя ад грыпу радзей і лягчэй хварэюць на каранавірус
Калі заражаешся ў масцы, кавід часта працякае лягчэй. Медыкі зразумелі чаму
Першы раз я захварэла на кавід у канцы кастрычніка. Звязваю гэта з працай — я працую выкладчыкам у адной з мінскіх ВНУ, такім чынам кантактую з вялікай колькасцю людзей як уласна на працы, так і на шляху да яе. На жаль, у кастрычніку Мінск яшчэ не бачыў масачнага рэжыму.
Праз усё гэта я зразумела, што маю кавід, яшчэ да атрымання вынікаў тэста. Тое, першае, заражэнне адзначылася для мяне, акрамя агульных сімптомаў прастуды, незвычайна моцным адчуваннем слабасці, тыповай для гэтай хваробы.
У псіхалагічным плане гэта ўсё ўспрымаецца больш цяжка. Нават калі чакаеш кавіду, пасля ўсіх навін, што мы чулі пра гэты вірус за апошні год, прыняць тое, што ён ёсць і ў цябе, трохі складаней, чым прыняць звычайную прастуду.
З іншага боку, і кавід можна перанесці без ускладненняў, таму няма прычын хвалявацца пры добрым самаадчуванні. Але ж шмат нервуюцца родныя, і гэта цяжкім грузам кладзецца на стан наваспечанага кавідніка.
Першы кавід скончыўся для мяне амаль без ускладненняў. Было шмат незвычайнага, стрэс ад самаізаляцыі і чэргі ў паліклінічных калідорах па 4—5 гадзін. Але не бачу прычын на гэта скардзіцца, бо разумею, наколькі бескантрольная ўся тая сітуацыя, у якой мы апынуліся. У такі цяжкі для ўсяго свету і нашай краіны ў асаблівасці час мой досвед — далёка не самае горшае, што можа здарыцца.
Другі кавід, таксама пацверджаны тэстам, я атрымала ў сярэдзіне сакавіка. Звязваю яго з сямейнай традыцыяй сумесных абедаў і вячэраў раз на тыдзень (калі таксама маеце такія традыцыі, самы час ад іх пазбаўляцца!). Для мяне другая хвароба праходзіла больш цяжка, чым першая: высокая тэмпература на працягу двух тыдняў, сімптомы прастуды і, на развітанне, невялічкая левабаковая пнеўманія па тыпу «матавага шкла».
Са свайго досведу ведаю, што варта правільна сябе весці ў час самаізаляцыі.
Кавід — гэта не час для побытавых подзвігаў. Калі не маеце на іх энергіі, лепей скарыстацца, калі ёсць такая магчымасць, дастаўкай ежы і пакінуць ужо гэты пыл на паліцах да лепшых часоў.
Адпачывайце, чытайце кнігі і глядзіце фільмы, на якія раней не мелі часу, а яшчэ напішыце ўжо нарэшце палітвязням — дзякуючы такім сэрвісам, як vkletochku.org, гэта можна зрабіць не выходзячы з хаты.
Лісты палітвязняў
І першы, і другі кавід выклікалі ў мяне падзенне працаздольнасці, сярод наступстваў таксама галавакружэнне і павышаная стамляльнасць. У першы раз дапамагалі аднавіцца ёга, медытацыя, вітаміны, дастатковая колькасць сну, зараз дзейнічаюць тыя ж метады.
Што датычыцца фізічнай і ментальнай нагрузкі, лічу, тут варта дзейнічаць у залежнасці ад свайго стану, але пры гэтым ні ў якім разе не спыняць актыўнасць. Не маеце энергіі на паўнавартасную трэніроўку? Зрабіце маленькі шпацыр або пашукайце ў інтэрнэце максімальна простыя комплексы фізічных практыкаванняў. Галоўнае — не губляць аптымізм.
І пасля першай, і пасля другой самаізаляцыі мяне непрыемна здзівіла колькасць людзей без масак у грамадскіх месцах. Вядома, гэтая гісторыя з кавідам доўжыцца ўжо працяглы час і ўсім цяжка. Але ж нашмат больш цяжка нашым цудоўным дактарам, і нашмат больш цяжка хворым на кавід у беларускіх шпіталях. Да таго ж, на свае вочы бачыла, як лёгка кавід перадаецца пры доўгім знаходжанні разам з інфіцыраваным у замкнёнай прасторы, нават пры нашэнні масак і захоўванні сацыяльнай дыстанцыі.
Таму, лічу, кожнаму з беларусаў варта сур’ёзна прааналізаваць свае паводзіны і падумаць пра тое, што можна зрабіць, каб знізіць рызыку для іншых і для сябе. Няхай наша сумленнае стаўленне да сваёй краіны ўключае ў сябе і сумленнае стаўленне да сваіх блізкіх.
