Ілюстрацыйнае фота Надзеі Бужан
Спартак Сірэнка, які быў затрыманы за ўдзел у акцыі пратэсту 14 ліпеня ў Мінску і асуджаны на 10 сутак арышту за «ўдзел у несанкцыянаваным масавым мерапрыемстве» і «непадпарадкаванні законным патрабаванням міліцыі», не выйшаў на волю 24 ліпеня, паведамляе spring96.org
Вядома, што пасля сутак ён быў пакінуты пад вартай у якасці падазраванага па арт. 342 Крымінальнага кодэкса - «Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх».
26 ліпеня ў кватэры Спартака Сірэнкі, дзе пражывае яго жонка, прайшоў ператрус. Супрацоўнікі міліцыі нічога не канфіскавалі.
Нагадаем, вечарам 14 ліпеня ў Мінску і іншых гарадах краіны прайшлі стыхійныя акцыі пратэсту супраць нерэгістрацыі кандыдатамі ў прэзідэнты Віктара Бабарыкі і Валерыя Цапкалы. У сталіцы ў той вечар было затрымана каля 300 чалавек, многія з іх былі аштрафаваныя і адпраўленыя на «суткі».
Пазней па гэтых падзеях былі распачатыя крымінальныя справы па трох артыкулах Крымінальнага кодэкса: 363 (супраціў супрацоўніку органаў унутраных спраў), 364 (Гвалт альбо пагроза ўжывання гвалту ў дачыненні да супрацоўніка органаў унутраных спраў), 342 (Арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх).
У рамках крымінальных спраў ужо затрыманыя Антон Шумаў, Уладзіслаў Усцін, Уладзімір Хамічкоў, Антон Валавік і яшчэ мінімум чатыры чалавекі.
