Па ініцыятыве літоўскага боку 23 красавіка адбылася тэлефонная размова Аляксандра Лукашэнкі з прэзідэнтам Літвы Гітанасам Наўседай, паведамляе БЕЛТА.
Кіраўнікі дзяржаў абмеркавалі шырокі спектр пытанняў двухбаковага супрацоўніцтва. Асаблівую ўвагу прэзідэнты надалі развіццю эканамічных адносін.
У прыватнасці, літоўскім бокам было закранута пытанне павелічэння паставак тавараў і грузаў з выкарыстаннем інфраструктуры Клайпедскага порта.
Таксама прэзідэнты падрабязна абмеркавалі тэму дыверсіфікацыі паставак энергарэсурсаў — нафты і газу. Бакі дамовіліся даручыць міністрам энергетыкі дзвюх краін прапрацаваць пытанні энергетычнай бяспекі.
Акрамя таго, кіраўнікі дзяржаў абмеркавалі ўзаемадзеянне дзвюх краін у сферы ядзернай бяспекі.
Аляксандр Лукашэнка і Гітанас Наўседа таксама абмеркавалі ўзаемадзеянне па супрацьдзеянні распаўсюду інфекцыі.
Закраналася падчас размовы і пытанне перспектыў ініцыятывы «Усходняе партнёрства».