Пачатак абкаткі пуцей чатырох станцый трэцяй лініі метро запланаваны на красавік. Пра гэта падчас наведвання станцыі метро «Вакзальная», якая цяпер будуецца, распавёў намеснік галоўнага інжынера тунэльнага атрада №1 «Метрабуда» Андрэй Серафімовіч, перадаюць «Мінск-Навіны».
«Ужо гатовыя пуці, цягнікі на абкатку пусцім у красавіку», — сказаў ён.
Цяпер ідзе мантаж аўтаматычных дзвярэй ахоўных экранаў на платформе (яна, дарэчы, тут на 6 метраў шырэй, чым на астатніх), чатырох эскалатараў, аздабленне тунэляў, якія вядуць да станцыі «Плошча Леніна». Адзін з тунэляў будзе ў даўжыню 270 метраў, другі — 180 метраў. Патокі пасажыраў будуць падзеленыя. Акрамя таго, зараз прабіваецца тунэль да платформы станцыі «Плошча Леніна».
