Фота Сяргея Гудзіліна
Мінск працягвае разлічваць на паступленне з Масквы кампенсацыі выдаткаў ад рэалізацыі ў Расіі падатковага манеўру ў нафтавай сферы. Пытанне застаецца нявырашаным, нягледзячы на парафіраванне прэм'ер-міністрамі дзвюх краін шматбаковай інтэграцыйнай праграмы, заявіў журналістам у Маскве 12 верасня міністр фінансаў Беларусі Максім Ермаловіч, паведамляе Інтэрфакс.
«Для нас важна вырашэнне тых пытанняў, якія засталіся нявырашанымі (пасля парафіравання праграмы інтэграцыі) — падатковы манеўр і яго наступствы. Мы вельмі на гэта разлічваем, але ў сваіх планах зыходзім з таго, што кампенсацыі за падатковы манеўр не будзе», — сказаў Ермаловіч.
Паводле яго слоў, «менавіта так пабудаваны бюджэт на наступны год». Аднак у сувязі з адсутнасцю кампенсацыі за падатковы манеўр гэта «бюджэт дастаткова жорсткі — мы ў наступным годзе не прырастаем па даходах у намінальным значэнні», — адзначыў міністр.
«Гэта сур'ёзная карэкціроўка, адаптацыя бюджэту да новых умоў. Пры тым, што выдаткі працягваюць аб'ектыўна расці — ад гэтага нікуды не дзенешся. І мы замест прафіцыту бюджэту ў апошнія гады сфармавалі бюджэт на наступны год з дэфіцытам», — сказаў ён.
Паводле яго слоў, «у залежнасці ад таго, ці будзе на наступны год кампенсацыя (за падатковы манеўр) або не будзе, мы будзем разумець, будзе дэфіцыт бюджэту ці не будзе».
У цэлым ён адзначыў, што «з Расіяй дэталяў ніякіх не вядома, але мы пачынаем працу». «Гаворка ідзе пра тое, што ў галіне фінансавай палітыкі мы павінны выпрацаваць адзіныя правілы і над гэтым будзем працаваць», — растлумачыў Ермаловіч.
