Ілюстрацыйнае фота Надзеі Бужан
Аляксандр Лукашэнка сёння ў час наведвання Брэста выказаў сваю пазіцыю наконт будаўніцтва ў горадзе акумулятарнага завода, перадае БелТА.
«Думаю, не буду вельмі арыгінальны ў сваім меркаванні: я, вядома, на баку людзей. Тут з'явіліся ўжо і арыштаваныя, і затрыманыя, і крымінальныя справы, і іншае. На жаль, яны з'явіліся тады, калі ўся інфармацыя стала здабыткам прэзідэнта», — звярнуў увагу Аляксандр Лукашэнка.
Кіраўнік дзяржавы расказаў, што як толькі да яго паступіла інфармацыя аб праблемах, звязаных з будаўніцтвам акумулятарнага завода, гэтую інфармацыю сталі старанна пераправяраць. Не разабраўшыся ў сітуацыі, махаць мячом проста непрымальна, падкрэсліў ён.
«Калі я пераправерыў інфармацыю, я ўбачыў, што тут людзі, якія перажываюць за экалогію, сваё жыццё, жыццё дзяцей, у асноўным маюць рацыю. І я ўбачыў правапарушэнні — з боку і асобных дзяржаўных служачых, і асобных дзялкоў, якія паабяцалі пабудаваць у агульным патрэбны нам аб'ект», — распавёў Аляксандр Лукашэнка.
Аляксандр Лукашэнка заўважыў, што ў Беларусі не было акумулятарнага завода, і праект у Брэсце быў добрым. Яго трэба было рэалізоўваць, аднак у адпаведнасці з усімі патрабаваннямі, падкрэсліў кіраўнік дзяржавы.
«Але гэта таго не варта, каб гнабіць людзей і гадзіць экалогію.
Мы пачалі вычышчаць, вымываць краіну, і на табе — лыжка дзёгцю. Таму я бачыў там крымінальныя справы і жорстка даручыў адпаведным службовым асобам заняцца гэтым пытаннем. Калі зразумелі, што прэзідэнт трымае на кантролі, рукамі развялі і адправілі ў месцы не гэтак аддаленыя некалькі чалавек. Астатнія ў бягах — шукаем. Дакладней, мы ведаем, дзе яны — прывязем дадому, гэта не пытанне. І спытаем на ўсю катушку», — сказаў Лукашэнка.
Ён дадаў, што калі акумулятарны завод у Брэсце будуць уводзіць у строй, то ён павінен адпавядаць усім экалагічным стандартам. Паводле яго слоў, таксама неабходна даць права мясцоваму насельніцтву правесці сваю экспертызу. «Толькі яны будуць вырашаць, ці быць гэтаму заводу і якім будзе гэты завод», - запэўніў кіраўнік дзяржавы.
У той жа час Лукашэнка нагадаў, што на хвалі чарнобыльскай катастрофы ў Беларусі актывізаваліся вельмі нацыяналістычныя рухі.
«І дзе яны зараз? Гэтага нацыяналізму хапала ўсюды, гэта прывяло да развалу Савецкага Саюза і шмат-шмат бед прынесла народам, асабліва беларусам. Так і тут — ёсць праблема, і нехта хоча палітычна пагрэць рукі: ужо ўладу мяняць будуць, бо завод дрэнны. Я хачу, каб мудрыя, адукаваныя, разумныя берасцейцы разумелі, што яны выкарыстоўваюць любую нагоду для таго, каб прарвацца ва ўладу. Яшчэ б параіў ім, хто выкарыстоўвае гэты выпадак, што яны будуць рабіць у гэтай уладзе. Цяперашняя ўлада разбярэцца, не з такімі праблемамі разбіраліся. Мы вырашым так, як трэба берасцейцам», - рэзюмаваў беларускі кіраўнік.
Пачынаючы з 4 сакавіка 2018 года кожную нядзелю праціўнікі завода выходзяць на плошчу Леніна пакарміць галубоў і тым самым выказаць свой маўклівы пратэст супраць завода. За гэты многіх з іх не раз затрымлівалі і штрафавалі.
14 чэрвеня 2019 года старшыня Брэсцкага аблвыканкама Анатоль Ліс прыпыніў будаўніцтва акумулятарнага завода да ліквідацыі выяўленых парушэнняў, а ў пачатку ліпеня кіраўнік кампаніі «Ай Паўэр» Віктар Лемяшэўскі разам з шэрагам падначаленых былі затрыманыя.
