У Міністэрстве адукацыі не бачаць праблемы з магчымасцю вучыцца па-беларуску. Там мяркуюць, што проста няма ахвотных запісвацца ў беларускамоўныя класы. Чыноўнікі запэўніваюць бацькоў, што гатовыя знайсці патрэбныя класы, праўда, далёка ад дома.
«Варта пачынаць з сябе. Ніхто не перашкаджае размаўляць з дзіцем па-беларуску, выхоўваць яго па-беларуску», — цытуе агенцтва «Інтэрфакс» прадстаўнікоў Міністэрства адукацыі.
Міністр адукацыі Ігар Карпенка, прэс-сакратарка ведамства Людміла Высоцкая і работнік прэс-цэнтра Андрэй Лазуткін.
Выказванне прадстаўнікоў Міністэрства адукацыі выклікала абурэнне ў фэйсбуку.
«Гэта проста гамон!» — адрэагавала Аляксандра Баярына.
«Варта пачынаць з сябе. Ну дык, міністэрства адукацыі, пачніце з сябе! Станьце нямымі на неабмежаваны час. Не размаўляйце, не пішыце, не чытайце. Атачыце сябе кітайскай мовай і пакутуйце, — прапанавала Кацярына Парыжацкая. — Што гэта, калі не інстытуцыялізіраваная дыскрымінацыя? Паразіты на падатках».
«Гэтыя людзі проста адкрыта зьдзекуюцца з нас. Бяз гучнага агульнага грамадзкага ціску яны не саступяць. Але яны саступяць, калі мы самі зразумеем, што важна, а што няважна. І будзем усе разам настойваць на тым, што сапраўды важна. Крок за крокам трэба вяртаць тое, што нам належыць і па праўдзе, і па законе», — упэўнены Міхаіл Баярын.
Ён заклікае падпісаць петыцыю ў падтрымку беларускамоўных садкоў: «Гэта няцяжка. І няцяжка заклікаць іншых яе падтрымаць. Гэта мінімум, які можа зрабіць кожны».
* * *
Міністр адукацыі — Ігар Карпенка. Нарадзіўся ў 1964 годзе ў горадзе Навакузнецку Кемераўскай вобласці. Былы старшыня Камуністычнай партыі Беларусі.
