Папярэдні і цяперашні лагатып клуба.
Гісторыя з беларусізацыяй «Граніта» пачалася яшчэ ў 2016-м, калі юрыст Ігар Случак напісаў у клуб стандартны зварот з заклікам выкарыстоўваць беларускую мову, і шырока абмяркоўвалася. Найперш таму, што старшыня рады футбольнага клуба Марына Быстрая ўсяляк гэтаму супраціўлялася. На яе нават складалі пратаколы за адмову адказваць па-беларуску і адказы не па тэме звароту.
Трэба сказаць, што Быстрая ў выніку пачала перапісвацца са Случакам па-беларуску, але тон яе лістоў не змяніўся.
«Вы вельмі рана зрабілі для сябе нейкія высновы, атрымаўшы адказ ад нас на беларускай мове. Мае адказы на беларускай мове не даюць вам падставы рабіць свае недалёкія высновы. Адказваю на беларускай мове, ды і наогул, адказваю вам, можна сказаць, пераступіўшы праз сябе і толькі з глыбокай павагі да службовых асоб дзяржаўных органаў, якія Вы ў прамым сэнсе гэтага слова сваімі лістамі дастаяце і будзеце даставаць, калі я вам не адкажу на беларускай мове», — пісала кіраўніца «Граніта».
Пасля яна ўвогуле забараніла Случаку дасылаць ёй афіцыйныя звароты:
«Акцэнтую вашу ўвагу на тое, што грамадскае аб’яднанне «Футбольны клуб «Граніт — Мікашэвічы» не з’яўляецца дзяржаўным органам, іншай арганізацыяй, у якую вы маеце права звяртацца ў адпаведнасці з патрабаваннямі заканадаўства аб зваротах».
І ў рэшце рэшт спыніла перапіску:
«Наогул, лічу, што Вы злоўжываеце правам, а Вашы дзеянні ажыццяўляюцца выключна з намерам нанесці шкоду іншай асобе. Лічу перапіску на гэтым спыненай».
Улічваючы перадгісторыю, замена эмблемы клуба — вялікі і важны крок «Граніта» да беларускасці.
