У Гродне пачалі вырабляць тратуарную плітку з пакетаў-маек і іншых упаковак. Пра гэта паведаміў БЕЛТА дырэктар Гродзенскага завода па ўтылізацыі і механічным сартаванні адходаў Вячаслаў Андрэеўскі.
Цяпер на прадпрыемстве ідзе наладка абсталявання па вытворчасці новага віду прадукцыі — палімерна-пясчаных вырабаў. Тут пачалі выпускаць некалькі відаў прадукцыі, асноўнай сыравінай для якіх выступаюць палімеры, адпраўленыя на сметнік жыхарамі горада, і звычайны пясок.
«Пасля запуску завода ў нас пачалі назапашвацца палімеры нізкай якасці, якія пакуль не перапрацоўваюцца ў Беларусі. Гэта ўвесь «хрумсткі» пластык, пакеты-майкі, упакоўка ад тартоў, напрыклад, і іншыя вырабы. Вырашылі знайсці спосаб, каб пусціць іх у справу», — адзначыў Вячаслаў Андрэеўскі. Для гэтых мэтаў была набытая лінія па вытворчасці палімерна-пясчаных вырабаў. Прынцып яе работы просты: палімеры здрабняюцца, змешваюцца ў пэўнай прапорцыі з пяском, у спецыяльнай машыне сумесь награваюць да 250 градусаў, затым атрыманая маса паступае пад прэс, з-пад якога і выходзяць гатовыя вырабы.
Пакуль асартыментны пералік уключае ў сябе сем пазіцый — некалькі відаў пліткі, бардзюрны камень і зялёная экапаркоўка. Зрэшты, розныя прэс-формы дазваляюць выпускаць больш за 150 відаў прадукцыі, у тым ліку рашоткі ліўнёвак, каналізацыйныя люкі.
«Калі параўноўваць з бетоннымі вырабамі, то плітка з палімераў куды трывалейшая пры ўдарах, нагрузках, яна не ўбірае ваду, не пакрываецца лёдам зімой, лягчэйшая па вазе і прасцейшая ў кладцы. Кошт такіх вырабаў прыблізна на 20% меншы за аналагі з бетону», — адзначае Вячаслаў Андрэеўскі. Цяпер прадукцыя праходзіць сертыфікацыю. У якасці эксперыменту на заводзе выклалі з пліткі ўласнай вытворчасці невялікую пляцоўку, нараканняў па эксплуатацыйных уласцівасцях няма.
На заводзе адзначаюць, што яшчэ на стадыі запуску вытворчасці да новай прадукцыі паўстала цікавасць. Прычым як з боку прыватных асоб, так і з боку камунальных арганізацый горада. У прыватнасці, новую плітку плануецца выкарыстоўваць для кладкі на кантэйнерных пляцоўках у Гродне. Пры трохзменным рэжыме працы ў суткі лінія зможа выпускаць да 2 т палімерна-пясчаных вырабаў. На сёння аднаго толькі пластыку (упаковак і пакетаў), прыдатнага для выпуску пліткі і непрыдатнага для іншай перапрацоўкі, тут сабралася каля 70 т.
Штодня на завод, які працуе ў кругласутачным рэжыме і без выхадных, у сярэднім паступае каля 220 т змешаных адходаў. Праз лінію сартавання праходзіць усё генераванае абласным цэнтрам смецце. Усе вынятыя другасныя рэсурсы адпраўляюцца на перапрацоўку. Прадпрыемства будавалася па праекце комплекснага абыходжання з адходамі. Завод будзе перапрацоўваць да 120 тыс. т адходаў у год. Акрамя будаўніцтва завода ў горадзе, устаноўленыя звыш 30 тыс. кантэйнераў для паасобнага збору смецця, закупленыя звыш за 50 новых смеццявозаў.
