president.gov.by
Прайшоўшы скрозь выпрабаванні, беларусы заслужылі права жыць на вольнай зямлі, у міры і дастатку, быць паўнапраўнымі ўдзельнікамі сусветных працэсаў. Аб гэтым Аляксандр Лукашэнка заявіў 1 ліпеня ў сваім выступе на ўрачыстым сходзе, прысвечаным Дню Незалежнасці Беларусі, паведамляе прэс-служба кіраўніка дзяржавы.
«Гісторыя беларускай дзяржаўнасці заўсёды была няпростай. Але імкненне нашага народа жыць у сваім доме было стрыжнем, які даваў сілу і мацаваў яго дух», — падкрэсліў кіраўнік дзяржавы.
Ён, у прыватнасці, адзначыў, што ў краіне памятаюць пра тых асветнікаў і падзвіжнікаў, якія стаялі ля вытокаў беларускай дзяржаўнасці. У іх ліку такія выбітныя землякі, як Еўфрасіння Полацкая, Кірыла Тураўскі, Францыск Скарына, Сымон Будны.
Паводле слоў кіраўніка краіны, у жыцці любога народа існуюць вехі, якія вызначаюць яго лёс, а асновы беларускай дзяржавы зарадзіліся яшчэ ў далёкім дзявятым стагоддзі.
«Ужо тады, 1155 гадоў назад, Полацк быў вядомым гандлёвым і адміністрацыйным цэнтрам славянскай Еўропы. А Полацкае княства — наша гістарычная калыска — мірнай, працавітай і прыязнай дзяржавай. Ужо тады яго жыхары самастойна вызначалі свой лёс. На народным вечы выбіралі правадыроў з ліку самых мужных і мудрых прадстаўнікоў сваёй зямлі, — сказаў беларускі лідар. — Бо ў той час да многіх народаў дзяржаўнасць прыйшла разам з варагамі.
Далёка не ўсім было даспадобы імкненне нашых продкаў быць самастойным. Таму бараніць і абараняць сваю зямлю ім даводзілася на працягу ўсёй яе гісторыі».
Ён адзначыў, што ідэя нацыянальнай дзяржавы праходзіла чырвонай ніткай праз усе пакаленні. Нягледзячы на шматлікія войны, палітычныя і эканамічныя ўзрушэнні, беларускі народ выстаяў, не знік з гістарычнай авансцэны. Наадварот, кожны няпросты перыяд узбагачаў гэтую ідэю сваім зместам, захоўваў і мацаваў яе, даваў сілы для новага этапу развіцця.
Вялікае Княства Літоўскае, напрыклад, надало магутны імпульс горадабудаўніцтву і ваеннай дзейнасці, падарыла Еўропе самую прагрэсіўную для таго часу юрыдычную думку — напісаны на старабеларускай мове Статут. «Значна раней шматлікіх нашых суседзяў — 500 гадоў таму — мы авалодалі друкаваным словам», — канстатаваў Аляксандр Лукашэнка.
Ён нагадаў, што беларускія землі былі і часткай буйных імперый, і гэта асабліва трагічныя старонкі гісторыі народа. «Не даравалі тады беларусам. Праз нашу зямлю, праз сэрца і душы ішлі ў розных кірунках полчышчы захопнікаў. Беларусы аказваліся ў эпіцэнтры найжорсткіх войнаў, якія ім былі зусім непатрэбныя.
Бізуном выбівалі жаданне людзьмі звацца. Але даўняя мара — жыць у сваёй незалежнай дзяржаве — прабілася і праз гэтыя суровыя выпрабаванні», — падкрэсліў кіраўнік дзяржавы.
Ён заўважыў, што наступствы Першай сусветнай вайны і рэвалюцыя 1917 года далі многім народам Еўропы магчымасць стварыць свае дзяржавы. «Гэтыя працэсы закранулі і нас. Пытанне беларускай дзяржаўнасці трывала ўвайшло ў парадак дня еўрапейскай геапалітыкі», - сказаў Аляксандр Лукашэнка.
«Былі мужныя, парой утапічнай спробы самавызначэння. Некаторыя дзеячы, адухоўленыя высокімі ідэямі, так і не зразумелі таго, што незалежнасць і свабоду войскі кайзераўскай Германіі не прынясуць ніколі. Яго творцам можа быць толькі сам народ, яго воля, калектыўны розум і лідары», — упэўнены кіраўнік дзяржавы.
Стварэнне Беларускай ССР Аляксандр Лукашэнка назваў важным гістарычным перыядам. Гэта палітыка-тэрытарыяльнае ўтварэнне ў складзе Савецкага Саюза не было па-сапраўднаму суверэннай дзяржавай, але мела шматлікія атрыбуты беларускай дзяржаўнасці: сцяг, герб, Канстытуцыю, мова, органы ўлады.
«Пасля на гэтай аснове быў сфармаваны каркас незалежнай Беларусі. Станаўленню маладой савецкай рэспублікі спрыялі масавы энтузіязм, інтэнсіўнае будаўніцтва і культурныя здзяйсненні», — адзначыў ён.
Ён нагадаў, што гэтае развіццё перапыніла вераломная агрэсія нацысцкай Германіі, калі на беларускую зямлю абрынуліся самыя жорсткія і бесчалавечныя выпрабаванні.
«У той вайне мы заплацілі вялікую цану. І пра гэты час нам заўсёды будуць нагадваць званы тысяч хатыняў, безыменных магіл, лагеры смерці і гета. Бязмежная мужнасць тых, хто не схіліў галаву перад ворагам: нашых партызан, падпольшчыкаў, сотняў тысяч патрыётаў. Менавіта тады наш народ даказаў ўусяму свету права на жыццё. Прызнаючы лёсавызначальную ролю вызвалення краіны ад фашысцкіх захопнікаў, мы прымеркавалі галоўнае дзяржаўнае свята — Дзень Незалежнасці Рэспублікі Беларусь - менавіта да 3 ліпеня», - сказаў кіраўнік дзяржавы.
