Спявачка Джамала паедзе ад Украіны на сёлетняе «Еўрабачанне» ў Стакгольме. І яе выступ будзе мець палітычнае гучанне.
На фінальным адборы ўдзельнікаў не абышлося без гарачых спрэчак суддзяў. Іх было трое: Андрэй Данілка (Верка Сярдзючка), прадзюсар Канстанцін Меладзэ і экс-пераможца Еўрабачання Руслана.
Меладзэ нумар Джамалы раскрытыкаваў за сцэнаграфію і касцюм. Праўда, ён прызнаў, што вакал у спявачкі бездакорны. Затое крымскую татарку абараняла Руслана. Яна, у сваю чаргу, абурылася з нагоды адсутнасці ўкраінскіх элементаў у песні і выступленні дуэта «Nuangels». А яшчэ нанесла літаральна ўдар ніжэй пояса SunSay, папрасіўшы яго патлумачыць, чаму ён у цяжкія для Украіны гады выступаў у Расіі.
Варта адзначыць, што ва Украіне суддзі публічна і часам доўга, не па паперцы, а з імправізацыямі абмяркоўваюць вартасці і слабінкі песень. Гэта моцна адрознівае ўкраінскі адбор ад беларускага.
У выніку трэцяе месца журы аддало SunSay, Джамала атрымала другое, а на першае нечакана выйшаў гурт «The Hardkiss».
Гледачы ж, наадварот, паставілі «The Hardkiss» на другое месца, а Джамалу — на першае. Яна і паедзе з Стакгольм са сваёй баладай-плачам «1944».
У Джамалы магутны вакал, а ў сваю песню яна ўклала ўсю душу.
***
Украінская спявачка нарадзілася ў сям'і крымскага татарына і армянкі. Вядомасць Джамале прынёс конкурс «Новая хваля 2009», які праходзіў у Юрмале, дзе яна атрымала гран-пры.
32-гадовая артыстка спецыяльна для нацадбору напісала песню «1944», на якую яе натхніў аповед прабабулі. Менавіта з гэтым годам звязаны самыя цяжкія ўспаміны ў яе сям'і.
Гаворка ідзе пра гвалтоўную дэпартацыю крымскататарскага народа.
Адзначаецца, што ўдзел у фінальным галасаванні прынялі больш за 300 тысяч чалавек, што з'яўляецца рэкордам для адборачных конкурсаў «Еўрабачання» ва Украіне.
