Хендрык Марыюс Ёнкерс. Фота Еўрапейскага патэнтнага офіса.
Рамонт расколінаў у бетонных пабудовах абыходзіцца Еўрапейскаму саюзу ў 6 мільярдаў еўра ў год. Галандскі мікрабіёлаг з Дэлфцкага ўніверсітэта Хендрык Марыус Ёнкерс прыдумаў, як вырашыць гэту праблему без дадатковых выдаткаў.
Ёнкерс распрацаваў асаблівы тып бетону, які можа самастойна «залечваць» расколіны.
Сакрэт бетону заключаецца ў адмысловай прысадцы са спораў бактэрый Bacillus pseudofirmus ці Sporosarcina pasteurii і лактату кальцыю. Споры дадзеных відаў бактэрый добра пераносяць гарачыню і холад і могуць заставацца жыццяздольнымі цягам стагоддзяў.
Калі ў бетоне ўтвараецца расколіна, у яе пачынае паступаць вільгаць. Тады бактэрыя абуджаецца і пачынае харчавацца лактатам кальцыю. У працэсе жыццядзейнасці бактэрыі вырабляюць вапняк, які цэментуе расколіны і не дае ім разрастацца.
Расколіна ў бетоне.
Расколіна, зацэментаваная бактэрыямі.
Ёнкерс кажа, што бактэрыі ў бетоне могуць зацэментаваць расколіны шырынёю да 0,8 міліметра. Для дэманстрацыі магчымасцяў свайго вынаходніцтва Ёнкерс пабудаваў дом з 6-сантыметровымі сценамі з распрацаванага ім арганічнага бетону. Мікрабіёлаг кажа, што будынак паспяхова «лечыць» расколіны.
Вытворчасць новага бетону плануецца запусціць у 2016 годзе. Аднак яшчэ раней можна чакаць іншую распрацоўку Ёнкерса — вадкасць для цэментавання расколінаў, якую можна наносіць на звычайны бетон.
