Групоўка «Ісламская дзяржава» апублікавала пяціхвіліннае відэа, на якім джыхадзісты, узброеныя кавадламі і дрылямі, знішчаюць на поўначы Ірака рэліквіі, якія адносяцца да VII стагоддзя да н.э.
Баевікі ІД, якія захапілі яшчэ ў чэрвені горад Масул, апублікавалі відэа, на якім паказана разбурэнне экспанатаў з музея старажытнасцяў, а таксама знішчэнне статуй на месцы археалагічных раскопак.
На відэа людзі ў чорнай вопратцы скідаюць на падлогу скульптуры і ламаюць іх пры дапамозе кавадлаў і нават электрычнай дрылі.
У прыватнасці, яны руйнуюць адзін з шэдэўраў асірыйскага мастацтва, які адносіцца да IX ст. да н.э — скульптуру крылатага быка з Нінэвіі, які лічыўся бажаством-абаронцам.
Джыхадзісты на відэа называюць гэтыя рэліквіі «ілжывымі ідаламі», якія падлягаюць знішчэнню.
Усе разбураныя скульптуры — сапраўдныя, і іх страта для сусветнай культуры незаменная, кажуць спецыялісты.
«Гэта не толькі культурная спадчына Ірака, гэтыя каштоўнасці належаць усяму свету. Яны неацэнныя, унікальныя. Я не магу паверыць у тое, што такое магло адбыцца», — сказала іракскі археолаг Ламія Гайлані з Інстытута археалогіі ў Лондане.
Баевікі ІД не толькі руйнуюць старажытныя каштоўнасці, але і прадаюць іх на чорным рынку для фінансавання сваіх аперацый.
На тэрыторыі, якая знаходзіцца пад кантролем «Ісламскай дзяржавы», знаходзіцца каля 2 тысяч археалагічных старажытнасцей. Сярод іх — старажытныя кнігі, якія джыхадзісты знішчаюць, бо тыя «супярэчаць вучэнню ісламу».
У студзені гэтага года джыхадзісты разрабавалі Цэнтральную бібліятэку Масула і бібліятэку Універсітэта Масула. Тысячы кніг былі спаленыя ў велізарным вогнішчы на вачах студэнтаў.
