Ужо сёння стартуюць курсы Паўла Севярынца «Курсы Ды-джэяў Адраджэння». 12 двухгадзінных заняткаў штотыдня, якія будуць праходзіць па аўторках.
Праграма разлічана для моладзі, якая хоча і можа дапамагчы Беларусі цераз працу ў яе культуры.
Павел кажа пра свае курсы цытатай з Бібліі: «Жніво вялікае ды працаўнікоў мала». У Беларусі на культурнай глебе працы хопіць усім. Мы ў сваю чаргу падрыхтуем сапраўдны «духоўны спецназ» для гэтага. Гэтыя курсы будуць беларускімі па форме і хрысціанскімі па змесце».
Удзельнікаў навучаць арганізоўваць і праводзіць культурніцкія мерапрыемствы, распавядуць пра асаблівасці і працу з інтэрнетам, радыё і тэлебачаннем.
Павел разлічвае на тое, што на першым занятку зала будзе поўная. Асноўным лектарам будзе сам Севярынец, на дапамогу яму будуць прыходзіць спецыялісты ў сферы інфармацыйнай бяспекі ды ТБ.
У выніку заняткаў удзельнікаў курсаў чакае «высадка ў глыбінцы», дзе прыйдзецца падрыхтаваць імпрэзу ўсяго за адзін дзень.
За ўсю гісторыю курсаў з 1999 г. (дзевяць выпускаў) было падрыхтавана каля 100 спецыялістаў «беларускага духоўнага спецназа», якія складаюць «Ордэн Ды-джэяў Адраджэння». Сярод іх — кіраўнікі Маладога Фронту Наста Палажанка і Зміцер Хведарук, лідары «Маладой Беларусі» Артур Фінькевіч і «Альтэрнатывы» Алег Корбан, пераможца міжнароднай алімпіяды па гісторыі Сяржук Васільеў, адзін з кіраўнікоў БХД Дзяніс Садоўскі, прэс-сакратар БАЖ Барыс Гарэцкі, чэмпіён Беларусі ў пажарным спорце Мікалай Тамашэвіч, грамадскія актывісты Андрэй Кім, Алёна Валынец, Ірына Губская, Кірыла Шык, журналісты Кастусь Шыталь, Віталь Зыблюк, Аксана Рудовіч.
Курсы будуць праходзіць з 11 лістапада — кожны аўторак, 18.00.
Адрас — Мінск, Чарнышэўскага, 3. Тэлефон — 8-029-516-08-61 (Павел).
Курсы бясплатныя.