Сацыялізм у Венесуэле: у касцёлах утварыўся дэфіцыт віна і аплатак 5

Каталікі ў Венесуэле забілі трывогу: у касцёлах сканчаюцца запасы віна, яго не хапае для правядзення набажэнстваў.

Як тлумачаць прадстаўнікі каталіцкай царквы, такая сітуацыя склалася з-за недахопу некаторых інгрэдыентаў, неабходных для прыгатавання віна. Адзіны вытворца віна ў краіне ўжо прыняў рашэнне спыніць прадаваць напой цэрквам.

«Наш пастаўшчык віна Bodegas Pomar сказаў, што больш не можа рабіць віно», — сказаў прадстаўнік касцёла Венесуэлы.

Наяўных запасаў царквы хопіць на два месяцы, папярэджваюць святары. Ці зможа царква ў далейшым закупляць віно за мяжой, пакуль невядома.

Праблема не прыходзіць адна, і святары чакаюць у бліжэйшы час росту цэн на аплаткі, якія выкарыстоўваюць для правядзення камуніі

.

«Вытворцы хлеба ўжо папярэдзілі, што будуць падымаць цэны, бо не могуць знайсці досыць мукі. Пшаніца ў нас не расце, яны ўсё закупляюць за мяжой. Пакуначак з асвячоным хлебам раней каштаваў 50 балівараў (8 даляраў), зараз ён каштуе ўжо 100» , — кажа святар.

Венесуэльцы адчуваюць недахоп цэлага шэрагу прадуктаў і тавараў штодзённага карыстання: цукру, малака, алею, кукурузнай мукі і нават туалетнай паперы.

Багатая нафтай Венесуэла імпартуе з іншых краін парадку 70% прадуктаў харчавання.

Паводле Бі-Бі-Сі

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ