Як я стварыў беларускамоўную суполку 13

Вырашыўшы выправіць гэта і праверыць, як сучасная моладзь ставіцца да роднай мовы, я стварыў беларускамоўную суполку «Укантакце».

Назва павінная быць простай і зразумелай, і я выбраў «Я ♥ беларускую мову». Вызначыўся і з напаўненнем: для пачатку гэта будуць цікавыя і яскравыя здымкі пэўных прадметаў, казачных персанажаў, жывёл і раслінаў, падпісаныя па-беларуску. Гэта мусіла спрыяць запамінанню новых беларускіх словаў у тых, хто не карыстаецца мовай штодзённа, але хацеў бы яе вывучыць.

Адразу я папрасіў паўдзельнічаць у суполцы некаторых сяброў. Каля 10 зацікаўленых чалавек далучыліся за адзін вечар. Што ж, нядрэнна для пачатку. Наступны этап складаўся з актыўнай рэкламы суполкі ў іншых беларускіх пабліках з вялікай колькасцю людзей. У паведамленні я прасіў уступаць у суполку тых, хто любіць беларускую мову, і прыкладаў да яго адно фота з суполкі.

На наступны дзень я быў вельмі здзіўлены тым, што колькасць удзельнікаў павялічылася да сотні. Але самае галоўнае — людзі пачалі ставіць шмат лайкаў і расказваць пра запісы суполкі на сваіх старонках! Натхніўшыся такім пачаткам, я з падвоенай энергіяй пачаў раскручваць групу — за тыдзень яна налічвала ўжо каля 300 чалавек.

Наведвальнасць расла, лайкаў і каментароў з’яўлялася ўсё больш.

Праз 10 дзён, да свайго здзіўлення, я заўважыў, што пра маю групу з’явіўся артыкул на сайце тэлеканала «БелСат», які пазней размясціла і газета «Наша Ніва». Пра такую папулярнасць я мог толькі марыць!

Дзякуючы гэтаму пра суполку даведалася яшчэ больш людзей, і за суткі далучылася больш за 200 чалавек! На дадзены момант за месяц існавання ў групе налічваецца каля 1500 удзельнікаў, але самае цікавае — зваротная сувязь: яны вельмі актыўна абмяркоўваюць многія запісы, спрачаюцца пра пераклад некаторых словаў, захапляюцца беларускім варыянтам перакладу і пачалі самі прапаноўваць свае фота з цікавымі словамі па-беларуску.

Трэба дадаць, што такіх суполак з’яўляецца ўсё больш. Некаторыя, напрыклад, маюць больш за сотню тысяч удзельнікаў. Вось найбольшыя з іх:

Lit.bel (101 000 удзельнікаў)

Беларускія рагатулькі | Коміксы (15 600 удзельнікаў)

Жарты па-беларуску (8 800 удзельнікаў)

Па-беларуску (5200 удзельнікаў)

Я мару… (2 000 удзельнікаў)

Беларуская мова (3200 удзельнікаў)

Белорусский язык | Беларуская мова (3800 удзельнікаў)

Беларускі дэматыватар (3250 удзельнікаў)

Сапраўдная беларуская лаянка, ХРЭН ТАБЕ Ў ВОЧЫ! (2400 удзельнікаў)

Як выявілася, моладзь не адвярнулася ад беларускай гаворкі: варта толькі падаць родную мову як-небудзь нестандартна, ярка (хоць бы ў форме прыгожых малюнкаў, падпісаных па-беларуску), і яна будзе імкліва набіраць папулярнасць. І дапамагчы гэтаму можа любы чалавек нават праз сваю старонку ў сацыяльнай сетцы.

Што да мяне, то стварэннем суполкі я не абмежаваўся і зрабіў адзіны ў Беларусі сайт пра англійскі футбол на беларускай мове, які толькі-толькі пачаў набіраць папулярнасць і пра які ўжо паспела напісаць «Наша Ніва».

Ігар Лосік, intex-press.by

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ