BiełTA: «Łukašenka navat z pavietra razhledzieŭ šmatlikija prykłady biezhaspadarčaści»
Zvolnieny dyrektar «Ivacevičdreva» — pradpryjemstva, jakim apiekavaŭsia Miaśnikovič.
23.11.2012 / 15:34
Alaksandr Łukašenka adchiliŭ ad pracy hienieralnaha dyrektara AAT «Ivacevičdreŭ» Barysa Michniuka.Kiravać pradpryjemstvam i navodzić paradak na vytvorčaści budzie Uładzimir Šulha, jaki da hetaha byŭ staršynioj kancerna «Biellespapierapram». Takoje rašeńnie Łukašenka pryniaŭ siońnia, naviedvajučy pradpryjemstva.
Łukašenku pakazali novy sučasny cech pa vytvorčaści
Adnak jašče pa darozie na pradpryjemstva Łukašenka hledzieŭ ź viertalota terytoryju staroha zavoda AAT «Ivacevičdreŭ», jaki raźmieščany niepadalok. Navat z pavietra Łukašenka razhledzieŭ tam šmatlikija prykłady biezhaspadarčaści. Tamu paśla naviedvańnia novaha cecha jon adyšoŭ ad zapłanavanaj prahramy i nakiravaŭsia na stary zavod, dzie vyjaviŭ krajniuju stupień biesparadku ŭ mnohich vytvorčych i bytavych pamiaškańniach.
Paŭsiudna byli raskidanyja vytvorčyja adchody, śmiećcie, u niekatorych pamiaškańniach byli vybityja šyby, nie vykonvalisia elemientarnyja praviły biaśpieki pracy. Hutaračy z rabotnikami hetaha pradpryjemstva, jakija spytali, što budzie dalej ź ich zavodam, Alaksandr Łukašenka skazaŭ:
«Mahu dakładna skazać, takoha zavoda, jak ciapier, jaki miescami ŭ śmietnik pieratvaryŭsia, u vas sapraŭdy nie budzie.
I heta zrobicie vy, mahčyma, z novym dyrektaram.
Treba zaŭtra va ŭradzie razhledzieć pytańnie — Šulhu nakiravać siudy dyrektaram zavoda, pakul nie naviadzie paradak. A staroha my zvolnim z zaŭtrašniaha dnia, bo tak nichto nie pracuje».
Varta adznačyć, što «Ivacevičdreva» apiekavaŭsia premjer-ministr krainy Michaił Miaśnikovič. Jon nie raz naviedvaŭ Ivacevičy.