U «Biełaruśkalii» nie pacvierdzili infarmacyju ab pieramovach z rasijskim miljarderam Kierymavym

Pra cikavaść rasijskaha miljardera da kupli akcyj «Biełaruśkałija» 28 lipienia paviedamili rasijskija «Viedomosti».

28.07.2010 / 13:22

U «Biełaruśkalii» nie pacvierdzili infarmacyju ab pieramovach z rasijskim miljarderam Sulejmanam Kierymavym adnosna prodažu akcyj kampanii. Jak zajavili BiełaPAN na pradpryjemstvie, «pra zacikaŭlenaść Kierymava ŭ kupli akcyj stała viadoma sa ŚMI, peŭnaj infarmacyi nakont hetaha niama».

Sulejman Kierymaŭ, dni.ru

Pra cikavaść rasijskaha miljardera da kupli akcyj «Biełaruśkałija» 28 lipienia paviedamili rasijskija «Viedomosti». Jak zajaviła vydańniu krynica, blizkaja da adnaho z akcyjanieraŭ «Urałkałija» (kantrolny pakiet naležyć Kierymavu), miljarder niadaŭna sustrakaŭsia z Alaksandram Łukašenkam i ad imia «Urałkałija» prapanavaŭ kupić kantrolny pakiet «Biełaruśkałija». Pavodle infarmacyi krynicy, za 51% pradprymalnik prapanavaŭ 7,5 młrd. dołaraŭ.

Supracoŭnik dziaržbanka, ź jakim biźnieśmien vioŭ pieramovy ab finansavańni takoj ździełki, zajaviŭ «Viedomostiam», što Kierymaŭ sapraŭdy cikavicca kuplaj akcyj «Biełaruśkałija». Ale razmova nie idzie pra nabyćcio kantrolnaha pakieta.

Pavodle jaho słoŭ, biełarusy vielmi doraha aceńvajuć «Biełaruśkalij» — u 20–30 młrd. dołaraŭ.

Raniej pieršy vice-premjer Uładzimir Siamaška zajaviŭ, što Biełaruś nie maje namieru pradavać ni kantrolny, ni błakiravalny pakiet akcyj «Biełaruśkałija». «Heta vielmi značny aktyŭ, my im raskidvacca nie majem namieru», — zajaviŭ Siamaška 30 červienia, vystupajučy ŭ parłamiencie.

Razam z tym pieršy vice-premjer adznačyŭ, što Biełaruś hatova pradać prykładna 20% akcyj pradpryjemstva pryblizna za 6–7 młrd. dołaraŭ.

Analityk «Banka Moskvy» Juryj Vołaŭ u intervju BiełaPAN zajaviŭ,

što zajaŭleny košt «Biełaruśkałija», kali paraŭnoŭvać biełaruskaje pradpryjemstva z anałahičnymi aktyvami, davoli vysoki.
«Pa mahutnaściach «Biełaruśkalij» u 1,5 razu bolšy za rasijski «Urałkalij». Uvieś pakiet akcyj rasijskaha vytvorcy ŭhnajeńniaŭ niadaŭna byŭ acenieny ŭ 10 młrd. dołaraŭ. Adpaviedna 100% akcyj «Biełaruśkałija» pavinny kaštavać 15 młrd. dołaraŭ», — padkreśliŭ ekśpiert.

U liku asnoŭnych pakupnikoŭ akcyj «Biełaruśkałija» nazyvajuć kitajski chołdynh Sinofert i kampaniju China Blue Chemicar.