Выйшлі на волю трое берасцейцаў, якіх асудзілі за падзеі 10 жніўня 2020
За тыдзень вызваліліся Раман Паўленка, Павел Мазько і Вадзім Чапялевіч, паведаміла Брэсцкая вясна.
29.11.2023 / 08:40
Павел Мазько, Раман Паўленка і Вадзім Чапялевіч
Раман Паўленка і Павел Мазько адбывалі тэрмін у наваполацкай калоніі, дзіцячы футбольны трэнер Вадзім Чапялевіч — у «Віцьбе».
Усіх асудзілі за акцыю пратэсту, якая адбылася 10 жніўня 2020 года. Чапялевічу і Паўленку за гэта далі па 3 гады калоніі. А Паўла Мазьку, якому ў жніўні-2020 было 17 гадоў, прыгаварылі да трох з паловай гадоў.
Усе трое цалкам адбылі тэрмін, які ім прысудзілі.
10 жніўня 2020 года ў Брэсце праходзілі сутыкненні паміж людзьмі, які пратэставалі супраць гвалту і фальсіфікацый вынікаў прэзідэнцкіх выбараў, і супрацоўнікамі АМАПа, падчас якіх АМАП кідаў светлашумавыя шашкі, а пратэстоўцы выставілі барыкады. На наступны дзень быў паранены пратэстовец Генадзь Шутаў, які памёр праз некалькі дзён у шпіталі Мінабароны, а потым быў яшчэ і пасмяротна асуджаны.