У якасці падазраваных па справе Каардынацыйнай рады прыцягнутыя звыш ста асоб — СК
Следчы камітэт распавёў падрабязнасці па так званай «справе Каардынацыйнай рады» — падазраваных больш за 100 чалавек.
28.11.2023 / 14:36
Прэзідыум Каардынацыйнай рады ў жніўні 2020 года, калі яна сапраўды была патрэбная. Злева направа — Павел Латушка, Марыя Калеснікава, Вольга Кавалькова, Максім Знак, Сяргей Дылеўскі. Латушка, Кавалькова і Дылеўскі цяпер у эміграцыі, Калеснікава і Знак — палітзняволеныя. Фота: Tut.by
У якасці падазроных па справе Каардынацыйнай Рады прыцягнута звыш ста асоб, праводзяцца следчыя дзеянні і аператыўна-вышуковыя мерапрыемствы, расказалі БЕЛТА у Следчым камітэце Беларусі.
СК сумесна з МУС збіраюць доказы адносна дзейнасці, якая вялася ў 2020 годзе па стварэнні Каардынацыйнай рад, піша Белта.
СК называе гэта «спробамі па захопе дзяржаўнай улады» і і прасоўвааннем «ідэі гвалтоўнай змены канстытуцыйнага ладу».
Лукашэнкаўцы сцвярджаюць, што спіс членаў Рады ім перадаў адзін з удзельнікаў КР, які нібыта вярнуўся ў Беларусь праз «камісію па вяртанні». Гэтае сцвярджэнне немагчыма праверыць, у мінулым такія заявы часта выяўляліся непраўдзівымі і скіраванымі на тое, каб пасеяць недавер.
СК падазрае ва ўчыненні злачынстваў, прадугледжаных ч.1 арт.357 (змова з мэтай захопу дзяржаўнай улады неканстытуцыйным шляхам) і ч.3 арт.361-1 (уваходжанне асобы ў склад экстрэмісцкага фарміравання ў мэтах учынення злачынстваў экстрэмісцкай накіраванасці) звыш 100 чалавек.
Цяпер праводзяцца следчыя дзеянні і аператыўна-вышуковыя мерапрыемствы, у тым ліку ператрусы. З улікам атрыманых доказаў будзе разгледжана пытанне аб запуску працэдуры спецыяльнай вытворчасці, піша Белта.
Сёння па краіне прайшлі масавыя ператрусы ў людзей, звязаных з Каардынацыйнай радай апазіцыі. Прыйшлі па месцы рэгістрацыі Паўла Латушкі, Сяргея Чалага, Юрася Губарэвіча і іншых.