За верасень у лесе заблукалі 60 чалавек. Ратавальнікі далі некалькі парадаў, калі вы згубіліся
Беларусы ходзяць у грыбы ў лясы і губляюцца, толькі з пачатку верасня зафіксавана 60 такіх выпадкаў. У МНС звярнулі ўвагу на тое, што людзі не баяцца заблукаць і ідуць шукаць грыбы, але дарогу да дома не знаходзяць.
28.09.2023 / 15:34
Фота: МНС
«Толькі з пачатку верасня ў лясах згубіліся 60 чалавек, а за гэты яшчэ не завершаны тыдзень ужо 10 чалавек звярнуліся па дапамогу, каб выйсці з гушчараў», — гаворыцца ў паведамленні.
Часцей за ўсё губляюцца пенсіянеры.
У ведамстве рэкамендуюць папярэдне вывучаць карту мясцовасці, куды грыбнікі збіраюцца ісці. Вопратку варта выбіраць яркую, каб не злівацца з лесам, а абутак павінен быць непрамакальны.
Не лішнім будзе ўзяць з сабой ліхтарык, запалкі, нож, запас ежы, сродкі ад насякомых.
Перад тым як ісці ў лес, пажадана расказаць сваякам, сябрам ці суседзям, куды менавіта ідзяце.
Важна, каб тэлефон быў цалкам зараджаным, а ў лесе не варта збочваць з пратаптаных сцежак.
«Калі вы ўсё ж заблукалі, Заставайцеся на месцы і паспрабуйце звязацца з ратавальнікамі па мабільным тэлефоне», — раяць у МНС.
Таксама рэкамендуюць свістаць і крычаць — для таго, каб прыцягнуць увагу. Акрамя таго, варта прыслухоўвацца да навакольных гукаў, якія дапамогуць вызначыць кірунак да найбліжэйшага населенага пункта.