Маравецкі: Польшча не дапусціць прымусовага перасялення мігрантаў
Прэм'ер-міністр Польшчы заявіў, што Варшава не дапусціць ні прымусовага перасялення мігрантаў, ні ўвядзення выплат з дзяржаў, якія адмовіліся прыняць мігрантаў.
09.06.2023 / 15:33
Матэвуш Мараваецкі. Фота Andreea Alexandru / AP
Падчас прэс-канферэнцыі ён нагадаў, што Польшча прыняла мільёны ўцекачоў з Украіны, абараняючы межы ЕС ад штучна выкліканага міграцыйнага крызісу на мяжы з Беларуссю, паведамляе Польскае радыё.
Кіраўнік урада падкрэсліў, што Польшча зʼяўляецца цвёрдым прыхільнікам эфектыўнай абароны межаў Еўрасаюза і не дазволіць «кантрабандыстам людзей дыктаваць Еўрасаюзу ўмовы».
«Мы выступаем за закрыццё межаў, у тым ліку на паўднёвай мяжы, і перадухіленне вялікіх міграцыйных мас, як мы зрабілі на ўсходняй мяжы. Урад партыі «Права і Справядлівасць» абараняе мір, спакой і бяспеку», — заявіў прэмʼер-міністр Матэвуш Маравецкі. Ён дадаў, што гэтае пытанне абавязкова будзе абмяркоўвацца на саміце лідараў ЕС.
У сваім сённяшнім паведамленні ў Twitter кіраўнік урада таксама паведаміў, што Польшча не будзе плаціць за памылкі іміграцыйнай палітыкі іншых краін. «Прымусовае перасяленне не вырашае праблемы міграцыі, але парушае суверэнітэт дзяржаў-членаў», — гаворыцца ў допісе прэмʼер-міністра.
Учора міністры ўнутраных спраў краінаў Еўрасаюза пры пратэсце Польшчы і Венгрыі прынялі палажэнні міграцыйнага пакту. Ён змяшчае прынцып абумоўленасці — альбо краіны пагаджаюцца прыняць мігрантаў, якія прыбываюць у паўднёвую Еўропу праз Міжземнае мора, альбо яны будуць плаціць каля 20 тысяч еўра за кожнага непрынятага чалавека. Польшча крытыкуе гэтае палажэнне і патрабуе, каб гэтым пытаннем займаліся лідары краінаў Еўрасаюза на саміце, бо там рашэнні прымаюцца аднагалосна.