«Жонцы псіхалагічна з трыма дзецьмі складана». Андрэй Дзмітрыеў чакае разгляду апеляцыі
«Андрэй трымаецца, наколькі гэта магчыма», — кажа Таццяна Караткевіч пра свайго паплечніка.
08.06.2023 / 15:08
Андрэй Дзмітрыеў у судзе. Фота: БелТА
Палітык быў затрыманы 11 студзеня гэтага года. Яму выставілі абвінавачанне па арт. 342 Крымінальнага кодэкса — «Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх», — нагадвае «Народная Воля».
Следчы камітэт паведамляў, што Дзмітрыеў удзельнічаў у паслявыбарчых акцыях пратэсту, а таксама «599 разоў перасякаў дзяржаўную мяжу Беларусі, з іх 33 — пасля 2020 года». Следства меркавала, што «наяўнасць кантактаў у Дзмітрыева з прадстаўнікамі Захаду і ЗША можа сведчыць аб каардынацыі яго «палітычнай» дзейнасці з-за мяжы».
Суд Маскоўскага раёна Мінска прызначыў палітыку паўтара года зняволення ў калоніі, але да разгляду апеляцыі Андрэй Дзмітрыеў знаходзіцца ў СІЗА.
— 23 чэрвеня Мінскі гарадскі суд плануе разглядзець апеляцыйную скаргу Андрэя Дзмітрыева на рашэнне суда Маскоўскага раёна, — распавяла «Народнай Волі» Таццяна Караткевіч, паплечніца палітыка. — У СІЗА Андрэй трымаецца, наколькі гэта магчыма, а далей усё будзе залежыць ад таго, у якое месца яго накіруюць для адбыцця пакрання.
— 3 мая ў Андрэя Дзмітрыева памерла маці, але на пахаванне ён не патрапіў…
— Цяжка, безумоўна, калі не можаш правесці ў апошні шлях самага блізкага табе чалавека. Гэта балюча, Андрэй з гэтай нагоды вельмі перажываў. Ён ведаў, што мама хварэе, і, упэўнена, што быў бы з ёй побач у апошнія хвіліны жыцця. Ён не забываўся пра маці ніколі, наведваў яе рэгулярна, нягледзячы на тое, што яна жыла ў Расіі.
Але ў апошніх лістах ад Андрэя не толькі сум і роспач, але гучаць і пазітыўныя ноткі. Часам падаецца, што ў тых, хто за кратамі, нават больш пазітыва, чым у некаторых людзей, якія знаходзяцца на волі. Спадзяюся, што такі настрой у Андрэя Дзмітрыева застанецца і ў калоніі.
— Як зараз яго сям’я?
— Псіхалагічна, безумоўна, складана. У Андрэя трое сыноў, двое з іх — яшчэ школьнікі. Таму жонцы Андрэя даводзіцца зараз адной і працаваць, і дзяцей даглядаць. Гэта няпроста.