Sietka «Vkusno i točka», vyjaviłasia, paśpieła padpisać damovu i vyhruzić častku pradukcyi dla biełaruskich restaranaŭ. Ale ich nie puścili
Stali viadomy novyja detali ŭ historyi sychodu «Makdonaldsa» ź Biełarusi. Pra ich raspavioŭ hiendyrektar sietki «Vkusno i točka», jakaja płanavała zajści ŭ našu krainu.
05.06.2023 / 10:56
Fota: sacsietki «Vkusno i točka»
«Historyja ź Biełaruśsiu vielmi cikavaja — ciapier heta niezaležny biznes, jon nie maje da nas nijakaha dačynieńnia. Mcdonald's u niejki momant vyrašyŭ syści ź Biełarusi, i tady ŭładalniki źviarnulisia da nas z prapanovaj stać partniorami-frančajzi. My pahadzilisia i navat paśpieli padpisać pahadnieńnie ab supracoŭnictvie i adhruzić častku pradukcyi», — raspavioŭ hienieralny dyrektar kampanii Aleh Parojev u intervju RIA Naviny.
Adnak, ź jahonych słoŭ, «z-za peŭnych abstavinaŭ Biełaruś u vyniku pajšła pa inšym šlachu».
«Jany vyrašyli stvarać svoj ułasny brend, jaki nie budzie mieć nijakaha dačynieńnia ni da Rasii, ni da «Vkusno i točka», ni da niejkich inšych rasijskich franšyz. My skasavali naša pahadnieńnie ab supracoŭnictvie, i ciapier jany pracujuć jak ułasny nacyjanalny brend, sprabujuć pabudavać biznes z nula», — rastłumačyŭ hiendyrektar «Vkusno i točka».
Uvosień sietka paviedamlała, što vychodzić na rynak Biełarusi i padpisvaje damovu frančajzi z kampanijaj «KSB Viktary restarany», jakaja kiruje 25 restaranami Mcdonald's ŭ krainie. U listapadzie anansavałasia, što restarany pačnuć pracavać pad rasijskim brendam. Ale ŭmiašaŭsia Łukašenka. U vyniku byłyja «Makdonaldsy» niejki čas pracavali pad šyldaj «My adkrytyja» U krasaviku «KSB Viktary restarany» paviedamiła, što pačała pracavać pad novym brendam — Mak.by. Hetu nazvu, darečy, taksama ahučyŭ Łukašenka padčas pasłańnia parłamientu i narodu.