Ціханоўская сустрэнецца з кіраўніцтвам Аўстрыі
У панядзелак пачынаецца візіт дэмакратычнага лідара Беларусі ў гэту альпійскую краіну.
04.06.2023 / 14:51
Святлана Ціханоўская. Фота Офіса Святланы Ціханоўскай
На запрашэнне міністра замежных спраў Аўстрыі Аляксандра Шаленберга і вярхоўнага камісара ААН па правах чалавека Фолькера Цюрка Святлана Ціханоўская выступіць на міжнароднай канферэнцыі «Нашы правы — наша будучыня» 6 чэрвеня ў Вене. Пра гэта паведаміў @pozirkonine галоўны дарадца дэмакратычнага лідара Франак Вячорка.
Форум прысвечаны 30-годдзю правядзення ў сталіцы Аўстрыі Сусветнай канферэнцыі па правах чалавека (14—25 чэрвеня 1993 года).
Візіт дэмакратычнага лідара ў Аўстрыю пачнецца 5 чэрвеня. Ціханоўская правядзе перамовы з Шаленбергам, іншымі членамі ўрада, сустрэнецца з прэзідэнтам краіны Аляксандрам ван дэр Беленам, дэпутатамі парламента.