Ukrainski vajskovy ekśpiert upeŭnieny, što połk Kalinoŭskaha ź lohkaściu zojdzie ŭ Biełaruś dla źviaržeńnia Łukašenki
«Dumajecie, što kali navat šmatlikaja vajuiučaja armija Rasii nie zmahła spynić ukrainskich dyviersantaŭ u Biełharadzie, to ŭ biełaruskaj armii biez realnaha bajavoha vopytu jość choć niejkija šancy?»
27.05.2023 / 19:13
Fota: Połk Kalinoŭskaha
Biełaruskija dobraachvotnickija atrady zmohuć ź lohkaściu zajści ŭ Biełaruś dla źviaržeńnia Łukašenki. Pra heta ŭkrainskamu ahienctvu UNIAN 27 maja paviedamiŭ vajskovy-palityčny ekśpiert Alaksandr Kavalenka.
Na jaho dumku, Łukašenka niezdarma daviaraje svaim instynktam i vielmi baicca biełaruskich dobraachvotnikaŭ, jakija zaraz vajuiuć na baku Ukrainy. Asablivy impuls da hetaha strachu dadali mienavita niadaŭniaja hučnaja vyłazka dyviersijna-raźviedvalnych hrup na terytoryju Rasii.
Ekśpiert upeŭnieny, što ŭ vypadku paŭtareńnia padobnaha scenara ŭ vykanańni Pałka Kalinoŭskaha u dačynieńni da Biełarusi, usia «papiarovaja» abarona Łukašenki adrazu ž rassyplecca.
«Praciahłaść hranicy Biełarusi i Ukrainy składaje 1084 km, pry hetym učastak hranicy pamiž nieakupavanymi častkami Ukrainy i i administracyjnymi častkami Rasii składajuć tolki 700 km. Uźnikaje pytańnie: kali 17 tysiač sałdat vajuiučaj Rasii nie zmahli na svaim učastku hranicy praduchilić praryŭ pa froncie šyrynioj u 40 km i hłybinioj u 7, to jakija naohuł šancy pa abaronie 1000 km miažy jość ŭ papiarovych biełaruskich sałdat, jakija pry hetym nie razu nie vajavali?», — zadajecca rytaryčnym pytańniem Alaksandr Kavalenka.
Ekśpiert aceńvaje kolkaść Pałka Kalinoŭskaha amal u tysiaču bajcoŭ (faktyčna — dźvie hatovyja bataljonna-taktyčnyja hrupy), niahledziačy na najaŭnaść biełaruskich dobraachvotnikaŭ i ŭ inšych ukrainskich vajskovych farmavańniach. Pry hetym na biełaruskaj miažy z Ukrainaj znachodzicca prykładna 2 tysiačy asabovaha składu armii Biełarusi.
Adnak, na jaho dumku, niachaj choć usio biełaruskaje vojska stanie na miažy z Ukrainaj, u jaho ŭsio roŭna nie budzie taho, što sa źliškami jość u biełaruskich dobraachvotnikaŭ — realny bajavy vopyt.
«Tamu paśla zaviaršeńnia vajny i pry najaŭnaści faktara ŭnutranaj padtrymki nasielnictva Biełarusi biełaruskija dobraachvotniki zmohuć pieramahčy łukašenkaŭskich siłavikoŭ i złamać u krainie represiŭnuju mašynu», — padahulniaje Alaksandr Kavalenka.
Nahadajem, što ŭ samym pačatku vajny da Ukrainy dałučylisia biełaruskija dobraachvotniki, častka jakich paśla pieratvaryłasia ŭ Połk Kalinoŭskaha. Biełaruskija bajcy vajavali i praciahvajuć vajavać na samych haračych učastkach frontu, zdabyvajučy pieramohi i pry hetym, na žal, časam niesučy straty.
Asnoŭnaj metaj biełaruskich dobraachvotnikaŭ źjaŭlajecca źviaržeńnie režymu Łukašenki šlacham dasiahnieńnia pieramohi Ukrainy ŭ vajnie suprać Rasii.
Čytajcie taksama:
Bajcy Pałka Kalinoŭskaha chitraściu vyklikali ahoń rasijan pa ich ža pazicyjach