«Dazvoliŭ sabie hańbić BRSM, vinu pryznaju». Na manier HUBAZiKa jurfak BDU staŭ publikavać «pakajalnyja videa»
Jurydyčny fakultet BDU pieraniaŭ zahannuju praktyku siłavikoŭ i staŭ zapisvać videa sa studentami, dzie prymušaje ich vybačacca.
24.05.2023 / 11:43
Skryn videa, jakoje vykłaŭ jurfak BDU. U aryhinale tvar nie schavany i student nazyvaje svajo imia
Takoje videa jurfak apublikavaŭ u storyz svajho instahram-akaŭnta.
U im student-treciakurśnik na fonie emblemy BDU i vyjavy Fiemidy vybačajecca pierad administracyjaj fakulteta i BRSM.
«Ja, student treciaha kursa BDU, dazvalaŭ sabie raspaŭsiudžvać dyskredytujučyja źviestki ŭ adnosinach da administracyi jurydyčnaha fakulteta, a taksama źviestki, jakija hańbiać BRSM jurydyčnaha fakulteta. Svaju vinu całkam pryznaju, kajusia. Na asnovie svaich pamyłak rekamienduju moładzi pilna sačyć, što kamu i dzie i ŭ jakoj situacyi jany hnavorać, a taksama pracavać na karyść svajoj krainy», — ahučvaje ŭ videa student tekst, jaki, vidavočna, jaho prymusili skazać.
Jurydyčnaja supolnaść adreahavała na takoje parušeńnie pravoŭ.
Ekśpiertka ŭ nalinie mižnarodnaha prava i pravoŭ čałavieka Kaciaryna Dejkała zaŭvažaje: paradaksalna, što mienavita jurfak, dzie pavinny byli b vučyć pavažać pravy, pieraniaŭ takuju praktyku.
«Źviarnicie ŭvahu, (i heta samaje strašnaje), što robiać heta moładzievyja arhanizacyi fakulteta. Nie HUBAZ, nie KDBšniki, a moładzievyja arhanizacyi fakulteta, jakija navat nie saromiejucca stavić svaje tehi: studsajuz jurfaka, studencki prafsajuz i BRSM.
U chłopcaŭ — budučych jurystaŭ navat nie chapaje kiemlivaści, kab zrazumieć, što heta ŭsio — dokazy, jakija fiksujucca. U kamsamolskim zapale tak chočacca adznačycca: my nasrali i napisali horda «heta zrabili my»!
Nu i nahadaju, što mienavita parušajecca takim videa: svaboda ad źnievažalnaha hodnaść zvarotu, svaboda vykazvańnia mierkavańnia, prava na nieŭmiašańnie ŭ asabistaje žyćcio i prava na adukacyju (u častcy stvareńnia spryjalnaj atmaśfiery biez abraz i prynižeńnia hodnaści ŭ adukacyjnym ustanovie)», — prakamientavała ŭ fejsbuku Kaciaryna Dejkała.
Na toje, što hetym videa fakultet parušaje zakon, źviartaje ŭvahu i advakatka Maryja Kolesava-Hudzilina.
«Prymus da ŭdziełu ŭ takich rolikach parušaje svabodu vykazvańnia mierkavańniaŭ. Heta pramoje parušeńnie prezumpcyi nievinavataści, kali čałaviek vymušany ŭ niepraciesualnaj formie pryznacca ŭ ździajśnieńni zabaronienych dziejańniaŭ.
Takoje videa parušaje prava nie padviarhacca žorstkamu, biesčałaviečnamu i źnievažalnamu abychodžańniu abo katavańniam.
Ja ŭpeŭniena, što tych, chto prymušaje zdymacca ŭ padobnych videa, možna pryciahnuć da adkaznaści. Heta traplaje pad kvalifikacyju art. 426 Kryminalnaha kodeksa (złačynstva suprać čałaviečnaści, jakoje ździajśniajecca pradstaŭnikom dziaržavy)»,
— padkreślivaje Kolesava-Hudzilina.