Арастовіч патлумачыў, чаму не баіцца сцэнара з расійскім стаўленікам на месца Лукашэнкі
Былы дарадца Офісу прэзідэнта Украіны выказаўся пра тое, што можа быць, калі Лукашэнка памрэ.
15.05.2023 / 12:09
Аляексей Арастовіч пад час інтэрв'ю. Скрыншот відэа
На думку Аляксея Арастовіча, якую ён выказаў у інтэрв'ю ютуб-каналу «Фейгин LIVE», у выпадку смерці Лукашэнка ўзнікне рэзкае абвастрэнне ўнутры краіны і знешнепалітычнай сітуацыі вакол Беларусі. І наступствы гэтага абвастрэнне не вядомыя.
Ён адзначае дзве групы меркаванняў. Першая — Масква зараз жа паспрабуе паставіць сваю марыянетку і акупаваць Беларусь. Другая — у Беларусі пачнуцца працэсы, якія дазволяць «вырвацца з кіпцюроў» Масквы.
Былы дарадца Офісу прэзідэнта Украіны не верыць у хуткую акупацыю Беларусі. І тлумачыць, чаму.
У Расіі, на яго погляд, няма ніводнага свабоднага сілавіка на тое, каб «нешта там акупаваць, стабілізаваць і кіраваць».
Па-другое, як адзначае Арастовіч, настроі ў Беларусі катэгарычна супраць уступлення ў вайну ў любой форме і знаходжання ў гэтай вайне.
«Лукашэнка, калі ўтрымліваў беларускую армію ад уступлення ў вайну, ён апеляваў меркаваннем народу ў гэтым. Усе беларусы разумеюць, што ім дакладна не трэба ў гэтую вайну ўступаць. І не таму, што ён [Лукашэнка] такі залаты і яхантавы. (…) Тут на рэдкасць супалі меркаванні».
Арастовіч не думае, што новы кіраўнік, «незалежна ад таго, марыянетка ці не, зможа пераламаць трэнд і прымусіць беларусаў ваяваць». Таму ён не вельмі асцерагаецца смерці Лукашэнкі і не верыць, што гэта можа прывесці да ўступлення Беларусі ў вайну. Хутчэй наадварот:
«Смерць Лукашэнкі ўтрымлівае ў сабе вельмі моцную магчымасць для контргульні. Увесь клан Лукашэнка будзе знесены. Прыйдуць нейкія палітыкі, якія не могуць не быць кампраміснымі, таму што сілаю цяпер у Беларусі ўладу не навяжаш. Чыста маскоўскага стаўленіка там не будзе ва ўмовах, якія там склаліся. І таму ёсць нядрэнны шанц на тое, што ва ўладу прыйдуць людзі з іншым пунктам гледжання адносна Масквы. І з іншым пунктам гледжання адносна Украіны. Яны дакладна не зацікаўленыя ў вайне».
Аляксей Арастовіч лічыць, што смерць Лукашэнка значным чынам паўплывала б на ход гэтай вайны. А таксама прывяла б да поўнага перафарматавання сітуацыі ў Беларусі і, адпаведна, ва ўсіх сумежных краінах па беларускім вектары. Ён лічыць, што на падзеі, якія разгорнуцца ў Беларусі, ва Украіны таксама будзе шанц паўплываць дыпламатычным шляхам.
Былы дарадца Офісу прэзідэнта Украіны адзначае, што ён «больш асцярожны аптыміст у гэтым пытанні, чым песіміст адносна таго, што 40 тысяч беларускіх салдатаў пабягуць ваяваць з Украінай».
У канцы сваіх разваг Аляксей Арастовіч яшчэ раз падкрэсліў, што не верыць у тое, што Беларусь стане прамаскоўскай: «Там няма такога патэнцыялу ад слова «наогул». Чаго яны не хочуць, так гэта станавіцца прамаскоўскімі. Тым больш прамаскоўскімі ў варыянце вайны з Украінай».
Чытайце яшчэ:
Арастовіч лічыць, што магчымая другая расійска-ўкраінская вайна. І назваў меркаваныя даты
Арастовіч расказаў, як на пачатку вайны заходнія палітыкі чакалі ад Украіны кампрамісу