У мінскай школе імя праўладнага пісьменніка Чаргінца адкрылі музей, прысвечаны Чаргінцу. Пры ягоным жыцці
У сярэдняй школе № 76 Мінска адкрыўся музей, прысвечаны народнаму пісьменніку, ганароваму старшыні праўладнага Саюза пісьменнікаў Беларусі, генералу-лейтэнанту Мікалаю Чаргінцу. Чым вядомы Чаргінец, згадвае «Радыё Свабода».
29.04.2023 / 18:45
Мікалай Чаргінец — у цэнтры фота падчас адкрыцця музея. Фота: Аляксей Мацюш, sb.by
Як апісвае падзею дзяржаўная прэса, Чаргінца сустракалі «громам апладысментаў і ваенным аркестрам».
У экспазіцыі музея, як вынікае з фотасправаздачы дзяржаўных СМІ, прадстаўленыя яго кнігі, медалі, дыпломы, вопратка, фрагменты зброі.
Так выглядае школьны музей, прысвечаны асобе Мікалая Чаргінца. Фота: Аляксей Мацюш, sb.by
У снежні 2022 году згаданую мінскую школу ўжо назвалі імем Чаргінца, хоць звычайна школы называюць імёнамі людзей ужо пасля іх смерці.
84-гадовы Чаргінец піша на рускай мове. Атрымаў вядомасць як аўтар міліцэйскіх дэтэктываў «Следствие продолжается», «Финал Краба», «Служба — дни и ночи», «Вам — задание», «За секунду до выстрела».
Самым скандальным творам Чаргінца з'яўляецца раман «Тайна Овального кабинета», у якім з шэрагам інтымных сцэнаў пісьменнік апісаў кіраванне прэзідэнта ЗША Біла Клінтана.
З прыходам да ўлады Аляксандра Лукашэнкі Чаргінец падтрымаў яго. Больш за дзесяць гадоў ён узначальваў камісію міжнародных спраў у Савеце Рэспублікі (1996—2008), у 2001-м быў даверанай асобай Лукашэнкі на прэзідэнцкіх выбарах.
Чаргінец з'яўляўся першым кіраўніком Саюза пісьменнікаў Беларусі (СПБ), створанага ў 2006-м, калі частка літаратараў, якая знаходзілася на прадзяржаўных пазіцыях, выйшла з адзінага Саюза беларускіх пісьменнікаў (СБП), які існаваў яшчэ з сярэдзіны 1930-х гадоў. СПБ атрымаў дзяржаўную падтрымку, памяшканні ў будынку Дома літаратараў у цэнтры Мінска, а таксама кантроль над дзяржаўнымі літаратурнымі выданнямі. Што тычыцца «недзяржаўнага» СБП, то ў 2021 годзе Вярхоўны суд яго ліквідаваў.
У час, калі Саюзам пісьменнікаў кіраваў Чаргінец, наклад калісьці папулярнага штотыднёвіка «Літаратура і мастацтва» зменшыўся амаль у дзесяць разоў. З ведама Чаргінца імёны шэрагу вядомых пісьменнікаў былі ўнесеныя ў так званыя «чорныя спісы» дзяржаўных выдавецтваў.
У 2022-м Чаргінец стаў ганаровым старшынёй СПБ, Лукашэнка даў яму званне народнага пісьменніка Беларусі, паставіўшы ў адзін шэраг з Якубам Коласам, Янкам Купалам, Максімам Танкам, Рыгорам Барадуліным і шэрагам іншых славутых аўтараў. Упершыню званне атрымаў той, хто піша па-руску.
Чытайце таксама:
Упершыню званне «народнага пісьменніка Беларусі» прысвоілі рускамоўнаму літаратару
Ці будзе што забараняць у новай Беларусі? Унікальны кейс «антыкніжнага рэжыму»