Былога «тэрарыста» з Гомеля Ігара Альхова судзяць за спробу ўцёкаў з псіхіятрычнай лякарні
Не зусім звычайная крымінальная справа разглядаецца Мінскім раённым судом у дачыненні да 31-гадовага жыхара Гомеля Ігара Альхова. Мужчыну абвінавачваюць ва ўцёках з папраўчай установы, якая выконвае пакаранне ў выглядзе пазбаўлення волі, арыштнага дома або з-пад варты (ч. 1 арт. 413 Крымінальнага кодэкса), паведамляе «Вясна».
18.03.2023 / 11:52
Вядома, што суд Цэнтральнага раёна Гомеля 15 жніўня 2022 года вынес вызначэнне, згодна з якім у дачыненні да палітзняволенага Ігара Альхова прымяніў прымусовыя меры бяспекі і лячэння ў выглядзе змяшчэння ў псіхіятрычны стацыянар са строгім наглядам.
Нібыта ён, у стане непрытомнасці, здзейсніў грамадска-небяспечныя дзеянні, а менавіта — акт тэрарызму (ч.1 арт. 289) і абразу Аляксандра Лукашэнкі (ч.1 арт. 368).
Як палічыла следства, Ігар Альхоў, нібыта хацеў у мэтах перашкоды палітычнай дзейнасці, застрашвання насельніцтва і дэстабілізацыі грамадскага парадку ўзарваць адміністрацыйны будынак у Гомелі па вуліцы Білецкага (вядома, што там месціцца абласное упраўленне КДБ), дзеля чаго азнаёміўся на адным з ютуб-каналаў са спосабамі вырабу выбуховых рэчываў. Затым набыў неабходныя кампаненты для іх вырабу, у тым ліку для сумесевых складаў тыпу «акісляльнік плюс гаручае» і прыгатаваў такую сумесь. Пазней спрабаваў набыць радыёпульт для ініцыявання зарадаў самаробных выбуховых прылад на адлегласці, аднак ягоная супрацьпраўная дзейнасць была спыненая праваахоўнымі органамі.
Ён жа, публічна ў непрыстойнай форме абразіў, прынізіў гонар і годнасць Лукашэнкі ў сувязі з ажыццяўленнем ім сваіх паўнамоцтваў. Альхоў уласнаручна напісаў тэкст, агучыўшы і зафіксаваўшы яго з дапамогай неўстаноўленай відэазапісваючай прылады, пасля чаго адаслаў дадзены відэазапіс не менш, чым двум карыстальнікам месэнджара Tэлеграм.
Судовы працэс над Альховым пачаўся яшчэ яшчэ 26 траўня і з доўгімі перапынкамі доўжыўся да 15 жніўня 2022 года. У выніку суддзя Цэнтральнага раёна Гомеля Сяргей Кармановіч вынес вызначэнне аб накіраванні яго ў РНПЦ псіхічнага здароўя ў Навінкі. Паколькі пасля вынікаў псіхіятрычнай экспертызы, у Альхова былі «выяўленыя парушэнні ў псіхічнай сферы, і на час здзяйснення злачынства ён не мог усведамляць значэнне сваіх дзеянняў быў не здольны да адэкватнага ўспрымання рэчаіснасці».
Манавіта ў Навінках, на тэрыторыі РНПЦ, існуе псіхіятрычны стацыянар са строгім наглядам. З развіцця падзей вынікае, што Альхоў паспрабаваў здзейсніць адтуль пабег.
Новую крымінальную справу па факце ўцёкаў з псіхіятрычнага стацыянара са строгім наглядам разглядае ў Мінскім раённым судзе Ігар Іглікаў.
Альхова судзяць як «асобу, якая здзейсніла грамадска небяспечнае дзеянне, прадугледжанае крымінальным законам, у стане бессвядомасці або якая захварэла пасля здзяйснення злачынства псіхічным захворваннем (п. 13 арт. 6 КПК)». Пасядждэнне прызначанае на 27 сакавіка.