U Biełastoku admianili rašeńnie ab pierajmienavańni adnoj z vulic u honar Volnaj Biełarusi
Vajavodski administracyjny sud u Biełastoku admianiŭ pryniatuju ŭ vieraśni 2022 hoda pastanovu miascovaj haradskoj rady ab pierajmienavańni častki vulicy Elektryčnaj u vulicu Volnaj Biełarusi. Pryčynaj hetaha stała toje, što pierajmienavańnie praviali z parušeńniem zakona, piša «Radyjo Racyja».
16.03.2023 / 18:23
Fota: Radyjo Racyja
Vajavodski administracyjny sud 16 sakavika razhledzieŭ skarhu, padadzienuju žycharkaj hetaj vulicy. Na pierajmienavanaj častcy vulicy, aprača kvartałaŭ i ŭstanoŭ, znachodzicca konsulstva Respubliki Biełaruś, i mienavita heta padšturchnuła da pierajmienavańnia mienavita hetaha abjekta.
Žycharka vykazała sumnieŭ adnosna pravilnaści vykanańnia ŭsich pracedur pry pryniaćci hetaha rašeńnia i zapatrabavała, kab jano było admienienaje. I jana była takaja nie adna — pratest adnosna rašeńnia haradskoj rady padpisali jašče bolš za 60 žycharoŭ šmatkvaternych damoŭ na hetaj vulicy.
Razhledzieŭšy skarhu, sud paličyŭ istotnym dapuščanaje biełastockimi ŭładami parušeńnie zakanadaŭstva, źviarnuŭšy ŭvahu pierš za ŭsio na niedachopy ŭ źmieście abhruntavańnia hetaj pastanovy.
Vulica Elektryčnaja znachodzicca ŭ samym centry Biełastoka. Nazva hetaja — daŭniaja, jaje možna znajści na kartach horada 1935 hoda.
Fundacyja Tutaka ad imia biełarusaŭ, jakija žyvuć u horadzie, u minułym hodzie źviarnułasia da haradskich uładaŭ z prośbaj źmianić nazvu jaje častki, ad vulicy Varšaŭskaj da Jana Klemiensa Branickaha. Prezident horada vynios prajekt pastanovy na pasiadžeńnie rady i jana była ŭchvalenaja bolšaściu hałasoŭ: «za» prahałasavali vasiemnaccać čałaviek, «suprać» — troje, siem — ustrymalisia. Ale, jak akazałasia, aformlena ŭsio było niapravilna.
Čytajcie taksama:
U Čarnihavie pierajmienavali 37 vulic i zavułkaŭ, nazvy jakich źviazanyja z Rasijaj i Biełarussiu