Krytyka savieckaha pieryjadu ciapier ličycca «ekstremizmam». Takimi abviaścili 12 numaroŭ «Našaj historyi» i «Arche»
Ułady pryznali «ekstremizmam» asobnyja numary histaryčnych časopisaŭ. Farmuloŭki vyhladajuć absurdnymi.
14.03.2023 / 12:52
«Ekstremisckimi» pryznali nastupnyja numary časopisa «Naša Historyja»: №2 (19) — 2020 h., №8 (25) — 2020 h., №9 (26) — 2020 h., №3 — 2018 h., №5 — 2018 h., №4 (9) — 2019 h., №1 (18) — 2020 h., №3 (20) — 2020 h., №11 (28) — 2020 h.
A taksama hetyja numary časopisa «Arche Pačatak»: №4 (163) — 2019 h., №3 (166) — 2020 h., №4 (159) — 2018 h.
Što stała pryčynaj? Sud vyrašyŭ, što ŭ numarach «u formie schavanaj, ale lohka raspaznavalnaj ekstremisckaj tematyki»
pryvodziacca idei, «jakija dyskredytujuć i ačarniajuć savieckuju ŭładu i savieckaje minułaje Biełarusi».
A taksama ŭłady ŭhledzieli «prapahandu pratesnych idej, ustanovak i schiem dziejańnia pratestoŭcaŭ u baraćbie za źmienu ŭłady ŭ krainie pa prykładzie dziejańniaŭ revalucyjna aktyŭnych narodnych mas u inšych krainach i inšych histaryčnych epochach»,
«raspalvańnie varožaści pa prykmiecie prynaležnaści da prychilnikaŭ zachavańnia histaryčnaj pamiaci ab Druhoj suśvietnaj vajnie i dasiahnieńniach savieckaha pieryjadu raźvićcia Biełarusi i praciŭnikaŭ, aryjentavanych na pierafarmatavańnie histaryčnaj pamiaci va ŭhodu ideałahičnych daktryn, daminujučych u krainach Zachadu».
«Ideja aŭtaraŭ artykułaŭ skiravanyja na palaryzacyju biełaruskaha šmatnacyjanalnaha hramadstva na dźvie rezka procipastaŭlenyja adna adnoj hrupy, jakija prytrymlivajucca supraćlehłych pohladaŭ na historyju i budučyniu Biełarusi», — skazana ŭ sudovym rašeńni.
Rašeńnie suda Centralnaha rajona Minska nabyło siłu 9 sakavika. Suddzioj była Volha Mankievič.