У Гродзенскім заапарку лемураў ратуюць ад зімовай маркоты з дапамогай чарапах
Лемуры — жывёлы цеплалюбівыя. З надыходам халадоў яны адпраўляюцца зімаваць ва ўнутраны вальер і застаюцца там да вясны, але пачынаюць маркоціцца. Але супрацоўнікі Гродзенскага заапарка прыдумалі для іх лекі.
11.03.2023 / 19:22
Лемурам, рухомым і дапытлівым жывёлам, знаходжанне ў замкнёнай прасторы даецца няпроста. Шмат чаго супрацоўнікі заапарку пераспрабавалі, каб іх пацешыць, але самымі эфектыўнымі лекамі ад зімовай маркоты для іх стала падсяленне ў вальер двух стэпавых чарапах.
«Спачатку прыматы паставіліся да навасёлаў з вялікім падазрэннем, але праз некалькі дзён прывыклі да іх і нават пасябравалі. Цяпер лемуры ўжо без боязі падыходзяць да чарапашак, падоўгу назіраюць за імі, чапаюць лапкамі панцыр і нават падкрадаюць ежу ў сваіх марудлівых суседак», — распавялі ў заапарку.
Там таксама адзначылі, што са з'яўленнем новых суседзяў лемуры Глобус, Санта і Шэры перасталі сумаваць.